બિનકાયદેસર ઇમિગ્રન્ટ્સ અમેરિકામાં !
પ્રેસિડન્ટ ડોનાલ્ડ ટ્રમ્પે ફરી એક વાર ‘Make America Great’ ની ઝુંબેશમાં કોંગ્રેસને ચીમકી આપી !અમેરિકામાં કોઈ બિનકાયદેસર વ્યક્તિ ઘુસી જાય નહીં એટલે એમણે અમેરિકા અને મેક્સિકોની બોર્ડર વચ્ચે મોટી દીવાલ – કોટ ચણવા પચ્ચીસ બિલિયન ડોલરની માંગ કરી ; જેથી કરીને કોઈ બિનકાયદેસર રીતે છાનુંમાનું અમેરિકામાં ઘુસી જાય નહીં !“પણ વ્યક્તિ અને વિચાર સ્વાતંત્ર્યને વરેલા આ દેશના પાયામાં જે માનવતા – માણસાઈ રહેલાં છે , તેનું શું? કોઈ ગૃહ ક્લેશમાં ઘરનાં લોકોના ત્રાસથી ભાગીને અહીં અમેરિકા આવી જતું હતું , હવે તેમનું શું ? કોઈ સમાજના ચીલાચાલુ રીત રિવાજોથી કાંઈક જુદું જીવન જીવવા પ્રયત્ન કરતાં સમાજ એને રહેંસી નાંખતો, ને એ લોકો ભાગીને અમેરિકા આવતાં , હવે તેમનું શું થશે ?
નિર્બળ , તરછોડાયેલાં છે, જેમને દેશ દ્રોહી કહીને એમના દેશે તેઓને મારીનાંખવા મારાઓ રોક્યાં છે, તેવા લોકો ભાગીને ક્યાં જાય? અમેરિકાએ તો સરમુખત્યાર રાષ્ટ્રોના લઘુમતી પક્ષનાપીડિત લોકોને ભૂતકાળમાં
આશ્રય આપ્યો છે! હવે આ બધાંને જાકારો આપશું તો એ બિચારાં ક્યાં જશે?”
તમે દયાથી પૂછો છો !
“ અને આ નિર્દોષ બાળકોને તેમની માતાઓથી વિખુટા પાડવાનું નિર્દય કૃત્ય શું અમેરિકાને – દુનિયાની મહાન લોકશાહીને શોભે છે?”
આવું કેમ?
પણ ત્યાં મારું મન ભૂતકાળમાં જાતે અનુભવેલા અનેક પ્રસન્ગોમાં સરી પડે છે: સુંદર ગાડીમાં કોઈ મા અને બાપ પોતાના સંતાનને લઈને અમારા ડે કેર સેન્ટરમાં આવે છે. મા બાપ પાસે કાયદેસરનું સ્ટેટસ નથી એટલે સોશ્યલ સિક્યોરિટી નંબર પણ નથી; હા , બાળક અહીંયા જન્મેલ છે એટલે એના ઉછેર , ભરણ પોષણ માટે ગવર્મેન્ટની જુદી જુદી સંસ્થાઓ એમને મદદ કરે છેએમની પાસે ફૂડ સ્ટેમ્પ ના પૈસા છે અને ગવર્મેન્ટની ફૂડ પેન્ટ્રીમાંથી તેમને સંપૂર્ણ ગ્રોસરી વિના મુલ્યે મળે છે! રહેવા માટે સેક્શન ૮ નાં નજીવા ભાડામાં મકાન પણ છે ! મા બાપ હાઉસ ક્લિનિંગનો બિઝનેસ કરે છે: એમનાં જેવાં મેક્સિકો , હંદુરસ, એલ સાલ્વાડોર , કોલમ્બિયા , કોસ્ટારિકા , પોર્ટરિકોથી આવેલાં લોકો બધાંનાં ઘર ક્લીન કરવા જાય છે!
અને ધારો કે પતિ પત્ની ( કે બાળકના માતા પિતા ) વચ્ચે ઝગડો થાય તો સોસ્યલ વર્કર , વકીલ અને શારીરિક કે માનસિક તકલીફો ની સારવાર માટે હોસ્પિટલ અને થેરાપિસ્ટ બધાની સુવિધા છે: વિના મુલ્યે!
આ બધું જ મારા માનસ પટ પરથી ચલચિત્રની જેમ પસાર થઇ જાય છે… મને ખબર છે આ દયા પરોપકાર વૃત્તિની! કારણકે એ નાનાં ભૂલકાંઓને સ્પીચ પ્રોબ્લેમ કે કોઈ મંદ બુદ્ધિ કે મંદ પ્રગતિ (Delayed Development )બદલ બાળકને થેરાપિસ્ટની સગવડ મળે છે ! થેરાપિસ્ટ અમારા બાળમન્દિરમાં પણ પધારે છે.. વિના મુલ્યે: અલબત્ત મા બાપને માટે વિના મુલ્યે !
અમેરિકાની આ ઉમદા વૃત્તિથી તો એ જગતમાં પ્રખ્યાત છે!
પણ પ્રેસિડન્ટ ટ્રમ્પ કહે છે કે જેને અમેરિકા આવવું હોય તે આવે; પણ અરજી કરીને !
આવું કેમ?
કાયદેસર રીતે આવો !
હોશિયાર હોવ ને રિસર્ચ કરવું હોય, ભણવું હોય; પૈસા હોય ને બિઝનેસ કરવો હોય, નાણાંનું રોકાણ કરવું હોય ,કોઈ વિશિષ્ટ કલા હોય વગેરે વગેરે.. તો એપ્લિકેશન કરીને આવો! પણ માત્ર બાળક અહીંયા જન્મેલું હોય તો તેની સાથે મા બાપ કે અન્ય કુટુંબી જનોને બિનકાયદેસર પ્રવેશ નહીં મળે!
પણ મારું અળવીતરું મન !ક્યાંથી ક્યાં પહોંચી જાય છે! દશેક વર્ષ પહેલાં અમારે ત્યાં રસોઈ કરવા આવતી રૂપલને યાદ કરે છે!
ભારત છોડ્યા પછી રખડતાં રઝળતાં પુરા દોઢ મહિને , જાનના જોખમ સાથે ભટકતી એ અને એનો વર ચન્દુ મેક્સિકોની બોર્ડરથી સાંડીએગો ને ત્યાંથી શિકાગો આવેલ : અને તે માટે દેશમાં પૂરાં પચ્ચાસ લાખ રૂપિયા ફી આપેલી !
“એટલા પૈસામાં તો તમેંદેશમાં જ કોઈ ધન્ધો કર્યો હોત તો? “ મેં પૂછ્યું!
“દેશમાં ભ્રષટાચારીઓના ખિસ્સા ભરતાંયે કાંઈ નાં વળે , બેન !” એ બન્નેએ કહ્યું ! “આપણા દેશમાં સીધી રીતે મહેનત કરીને જીવવું શક્ય જ નથી!”
આજે એજ રૂપલ અને ચન્દુ બધું દેવું ચૂકતે કરીને , પોતાનું એક સબ વે ( રેસ્ટોરન્ટ ) ચલાવે છે!
તમે મહેનત કરો અને ફળ મેળવો !
એ લોકો ઉત્સાહથી કહે છે!
તો આવું કેમ?
જો આવા સખત કાયદાઓ થશે તો શું તેનાથી અમેરિકા ફરીથી ખરેખર મહાન દેશ બનશે ખરો ?
પછી સર્વિસ બિઝનેસ કોણ કરશે ?
મહેનતનું કામ કોણ કરશે? અત્યારે આપણે જોઈએ છીએ તેમ બાગ કામ , ઘરની સફાઈ , હાઉસ કીપિંગ અને રસ્તાઓ તેમ જ અન્ય કન્સ્ટ્રક્શન કામો જે મહેનત માંગી લે છે તે બધાં કામો શું લોકલ અમેરિકનો કરશે ખરાં ?
પણ –
પણ ,આજે ,આ આવું કેમ? પ્રશ્ન અને જવાબ -બન્ને -મારી જાત તરફ જ આંગળી કરે છે :
વરસો પહેલાં એક વાર ,”મેરા ભારત મહાન “કહીને, દેશનું યુવા ધન ભણી ગણીને પરદેશ જાય છે તે સૌને દેશદ્રોહી કેમ ન કહેવા ? એમ કોલેજમાં લેક્ચર આપતી હું , લગ્ન પછી ફરવાના બહાને અમેરિકા આવીને અમે યુવાન માબાપ અને અમારાં છૈયા છોકરાંવ નું લાવલશ્કર -બસ અમે રોકાઈ પડ્યાં આ સમૃદ્ધ દેશમાં સારાં જીવનની તક જોઈને !
જીવન વિષે કાંઈ જ ઝાઝું વિચાર્યા વિનાસ્તો!
અથવા ખુબ વિચારીને ઝાઝું નહીં વિચારવાનું એમ વિચારીને, ‘પડશે એવાં દેવાશે’ એમ વિચારીને અમેયે દોટ કાઢી હતી પૂરાં આડત્રીસ વર્ષ પહેલાં!
પ્રશ્ન છે: આવું કેમ?
અને જવાબ પણ એમાં જ છે: જ્યાં સમૃદ્ધિ છે, જ્યાં ઉર્ધ્ધવ જીવનની તકો છે ત્યાં વિશ્વના ગમે તે ખૂણેથી લોકો સ્થળાંતર કરીને આવશે જ! સદીઓ સુધી વિશ્વમાંથી લોકો ભારત આવતાં હતાં , દેશની આબાદી જોઈને!
આધુનિક યુગમાં પહેલાં ઇંગ્લેન્ડ અને પછીસાઉથ આફ્રિકા , ત્યાર બાદ અમેરિકા અને પછી મિડલ ઇષ્ટ નાં દેશો તરફ લોકો વળ્યાં ! અને પછી ઓસ્ટ્રેલિયા તરફ પ્રવાહ વળ્યો !
પ્રેસિડન્ટ ટ્રમ્પની અમેરિકાને ફરી મહાન બનાવો ભાવના ઉમદા છે, અને મજુર વર્ગ વિના એ મહાન કેવીરીતે બનશે તે પ્રશ્ન છે!
આવું કેમ ?
૪૨) આવું કેમ? બિનકાયદેસર ઇમિગ્રન્ટ્સ અમેરિકામાં !
6
"બેઠક" Bethak 