પ્રકૃતિ-પદ્માબેન કનુભાઈ શાહ

માર્ચ મહિનો  એટલે પ્રકૃતિ નો મહિનો … થોડા વખત પહેલા મેં હેમંતભાઈ ઉપાધ્યાય ની પ્રકૃતિ ની કવિતા મૂકી હતી .. જે તમે માણી હશે .. આજે  પદ્મામાસીની મનને ગમી જાય તેવી એક પ્રકૃતિ પર ની સુંદર રચના લાવી છું. પરમાત્માને અનુભવવાનો સહુથી સરળ માર્ગ છે પ્રકૃતિ.આમ જોવા જઈએ તો પરમાત્માની પ્રતિનિધિ  પ્રકૃતિ છે. કુદરતના આનંદને અનુભવશો તો પરમાત્મા પોતે આપને અનુભવવા લાગશે….આપણા પર્યાવરણ દોષે આપણને પ્રકૃતિથી દૂર કર્યા છે. પ્રકૃતિ સાથે જોડાવાનો અર્થ છે..પોતાના અસ્તિત્વમાંથી અહંકારને દૂર કરવો. આપણે બુદ્ધિ અને અહંકારથી એટલા સરભર બની ગયા છીએ કે પરમાત્મા માટે કોઇ જગ્યા જ નથી બચાવી. પરંતુ માસીની કવિતામાં તમે પ્રકૃતિને માણી શકશો …. પ્રભુએ કરેલા દિવ્ય સર્જનનું  દર્શન કવિતામાં કરાવ્યું છે..

પ્રકૃતિ છે વિશ્વમાં પ્રભુનું દિવ્ય દર્શન
આકાશ અને ધરતી ,દેવોનું ભવ્ય સર્જન
સૂર્ય ચંદ્ર તારા , વ્યોમે કરે છે નર્તન
વાયુ જલ પ્રકાશથી, આ ધરતીલાગે ઉપવન .
વૃક્ષ વેલ પર ફળફૂલ ધાન્ય ધરા પર પાકે,
લીલોતરીથી  ધરતી ફળદ્રુપ થઈને શોભે.
ગ્રાન્ડ કેનિયન,લુરે કેવરન્સ ને નાયગરા ફોલ્સ ,
પ્રકૃતિએ આપેલા  સૌંદર્ય અતિ અણમોલ
સુંદર દ્રશ્ય કૈલાસ અને માનસરોવર ,
માનવને પ્રભુએ, બક્ષ્યું સ્વર્ગ આ ધરતી પર .
રંગબેરંગી પતંગિયાને કીટ ભ્રમરનો ગુંજરવ ,
જાત જાતના પંખીડાઓ કરતા મધુરો  કલરવ .
મેના પોપટ મોરને  કોયલના ટહુકા મીઠા ,
પંચરંગી સુંદર રંગોને મોરપિચ્છમાં  દીઠા .
ઊંટ ઘોડા ગાય ભેંશ ,બકરા અને ઘેટા
માનવ માત્ર ના સુખ માટે પ્રભુએ પ્રેમે દીધા .

મિત્રો અહી કવિતા એક  નવો વળાંક લે છે   . અહી શબ્દોના આટા પાટા છે . પ્રકૃતિ શબ્દોનો  અર્થ  નવી રીતે કવિતામાં વર્ણવ્યો છે ..પ્રકૃતિનો બીજો અર્થ  એટલે   .સ્વાભાવિક ગુણ…પાંચ ભૂત, મન, બુદ્ધિ અને અહંકાર એ આઠ પ્રકૃતિ.. સરળ ભાષામાં મનનું બંધારણ.માનવી ના ગુણોની વાત કવિતામાં આલેખી છે . તેમજ વેદમાં કરેલ  વર્ણન – મૂર્ત, અમૂર્ત, સાકાર, નિરાકાર બધું તેશબ્દનો અર્થ પ્રકૃતિ થાય છે. …….ટુકમાં ………માનવીય સંબંધો, સ્વભાવ, જીવન અને પ્રકૃતિના વિષયો પર હૃદયને સ્પર્શે એવી ભાષામાં કવિતાના બીજા ભાગમાં રજુ કરી છે અને અંતમાં  પ્રકૃતિ ઇશ્વરનું સ્વરૂપ છે. એ વાતની પ્રતીતિ  એમની શુભ ભાવના થી કરાવી છે ..
કાળા ગોરાને ઘઉં વર્ણા છે માનવ .
તામસિક ,રાજસિક અને સાત્વિક ગુણસભર .
દેવ દાનવ અને માનવ સૌના જુદાજુદા વર્તન
કર્મ છે સૌના જુદાજુદા વેદ કરે છે  વર્ણન.
બલૂન હેલીકોપ્ટર  વિમાન અને ટ્રૈઈન
આ સઘળી વસ્તુઓ છે માનવ બુદ્ધિની દેન .
ઈર્ષા કપટ અભિમાનને બુરો મનનો ક્રોધ .
માનવનાં અંતરમાં રહેતા દુર્ગુણભર્યા દોષ .
સંતો દેતા અહર્નિશ શિક્ષાનાં સાચા બોલ .
હૈયે ઉતારી આચરણમાં નિર્મળ મનથી તોલ
સૌ માનવનાં મુખ પર રહો અખંડસ્મિત ,
જગમાં રહે સઘળે સુખ સમૃદ્ધિ ને શાંતચિત્ત .
દરેક પામે અન્ન વસ્ત્ર અને રહેવા સહુનેસદન
વિશ્વેશ્વર હું કરું સદા ઉત્કર્ષ માટે નમન

પદ્માબેન કનુભાઈ શાહ

-પુત્રવધૂઓ-મેઘલતાબેન મેહતા

મિત્રો ,
દરેક કવિ કે લેખકે ગુજરાતની નારીને સમય સમયાંતરે જુદી જુદી રીતે ચીતરવાનો પ્રયાસ કર્યો છે    ..ગયા વખતે આપણે સાસુ વહુની   વાતો કરી  તો આજે મેઘલતાબેન   પણ એમીની કવિતામાં પુત્રવધુની વાત લઈને આવ્યા છે કહેવતકથા – પુત્રના લક્ષણ પારણામાંથી ને વહુના લક્ષણ બારણામાંથી વાચી છે ,પરંતુ માસી તો કવિતા  રચીને લાવ્યા  છે.  પૃત્રવધુના અલગ રૂપ સરળ રોજની ભાષામાં મુકાયા છે   આમ જોવા જઈએ તો પુત્રવધુના જેટલા રૂપ આલેખ્યા છે તે સ્ત્રીના છે .. એકવાત ખુબજ સરસ કરીછે…સંતૃપ્તે  કે સંતાપે;સાસુની  એ સંગાથી. . ..  પુત્રવધુઓ જાતજાની ભલે હોય પરંતુ ઘરના દરેક દુ:ખમાં વહુ પણ એટલો જ ભોગ આપે છે.અહી સાસુ કે વહુ  માત્ર સ્ત્રી છે. બન્ને આ વિરોધાભાસ વચ્ચે  જીવે છે છતાં લક્ષ એક છે  બન્ને પહેલા એક સ્ત્રી છે …. સ્ત્રીની એટલે  સંવેદના ,પ્રેમ, ભાવના ,કરુણા  ગમેતે સ્વરૂપે એ  તો લીલી છમ્મ જ રહે છે ..પછી તે વેલી કોઈ વાડ થોરની ……જ્યાં પણ ગઈ ત્યાં વળી પહોંચી…..

પુત્રવધૂઓ    જાતજાતની ;
રંગે   રૂપે      ભાતભાતની .

કોઈ અંબા કોઈ માંત ભવાની;
કોઈ વેલી કોઈ વાડ થોરની

કોઈ પોચી કોઈ પકડે બોચી ;
કોઈ ચંદા કોઈ સુરજ જેવી ;

કોઈ નમણી કોઈ છેક છકેલી ;
કોઈ મીઠી કોઈ મદથી ભરેલી ;

ભગવાને અંધારે  વહેંચી ;
જેના ઘરમાં જેવી પહોંચી ;

જ્યાં પણ ગઈ ત્યાં વળી પહોંચી
નથી હવે કોઈ કાચી પોચી .

સંતૃપ્તે  કે સંતાપે;
સાસુની  એ સંગાથી.
પુત્રના લક્ષણ પારણામાંથી;
વહુના લક્ષણ બારણામાંથી.

શ્રી ચંદ્રવદનભાઈ-નિતાબેન અને સાસુસેવા

મિત્રો ,

આજની કાવ્ય-પોસ્ટ છે ” નિતાબેન અને સાસુસેવા” !

આ પોસ્ટ ખરેખર “સત્ય ઘટના” આધારીત છે…….

ડૉ. ચંદ્રવદનભાઈ ની એક વાસ્તવિક  જીવનને અનુરૂપ સરસ રચના લાવી છું .. એમનો પરિચય એ  ગુજરાતી સાહિત્યકાર, કવિ કે લેખક નથી..પરન્તુ  હ્રદય-અંતરના ઉંડાણની પૂકાર રૂપે જે શબ્દો પાન પર વહે તેને કોમ્પ્યુટરના માધ્યમ દ્વારા અનેક વ્યક્તીઓને પ્રસાદી રૂપે વહેંચે છે .વ્યવસાયે ડો. છે પરંતુ … જે થાય, ન થાય એમાં પ્રભુ ઈચ્છા છે ! એવું  માને છે અને પ્રમાણે    સ્વીકારે   પણ છે…એમની પાસે સરળતા છે જે જોયું, જે સાંભળ્યુ, અને એ જ  વિચારધારા માં  વહે છે ...એ કહે છે.નથી હું કવિ, નથી હું કાલિદાસ, બસ, લખું છુ, અને, જરૂર હું પ્રભુનો દાસ ! એમનો વધુ  પરિચય કાવ્યમાં માણીએ..

---

નિતાબેન અને સાસુસેવા !

 

નિતાબેન અને સાસુસેવા !

સાસુને સાસુ નહી પણ મેં તો મા કહ્યા !

મા સ્વરૂપે નિહાળી, મેં તો અંતર ખોલી એને વ્હાલ કર્યા !…..(ટેક)

જનેતા સાથે રહી, હું તો મોટી રે થઈ,

સાસુની છત્રછાયામાં હું તો માતા બની,

પતિને અને સંતાનોને વ્હાલ કરી,

ઘરને મંદિર કરી, મેં તો હૈયે ખુશી ભરી !

લીલા છે પ્રભુ તારી અતી ન્યારી !…….સાસુને…..(૧)

આજ સાસુજી માંદા, અને છે ખાટલે,

દર્દ એમનું મુજ હૈયે મુજને સતાવે,

સેવા કરવા દેજે શક્તિ મુજને પ્રભુજી,

હશે ભુલો તો કરજે માફ, ઓ મારા પ્રભુજી !

લીલા છે પ્રભુ તારી અતી ન્યારી !……..સાસુને……(૨)

દવા આપી, દર્દ એમનું હું હલકું કરૂં,

તકલીફો એમની એને હું તો મારી ગણું,

ઉપરવાલા છે તારી જ ઈચ્છા એક સાચી,

નીચે રહેનાર હું ફક્ત અદા કરૂં ફરજ મારી !

લીલા છે પ્રભુ તારી અતી ન્યારી !…….સાસુને….(૩)

જે કર્યું કે કરૂં તે હું તો દીલથી કરૂં,

છોડી અફસોસ, પ્રભુજી તને વિનંતી કરૂં,

હવે તો છું હું શરણે તારી,

ના માંગુ છુટકારો, સંભાળજે સહન-શક્તિ મારી !

લીલા છે પ્રભુ તારી અતી ન્યારી !…….સાસુને…..(૪)

 

મિત્રો એક વાત યાદ રાખવા  જેવી માં તો માં જ પછી એ સાસુ હોય કે તમારી માં આખરે તો માં  જ છે ..સબંધ ને કેવી રીતે  પોષવા એ આપણી ઉપર છે ..આ સબંધ તો વાત્સલ્ય અને પ્રેમથી ભરેલો સબંધ છે . તેમાં કોઈ સ્વાર્થ નથી .જે સબંધો સાચવવા માટે આપણે પ્રયત્ન  ન કરવો પડે તેજ ખરો સબંધ .. સાસુ કે વહુને પ્રેમ કરવા પ્રયત્ન નહી  કરતા માત્ર .થોડી સાવધાની વર્તવાની જરુર છે..જેથી મુરજાય ન જાય …માત્ર મારપણાં નો  અહેસાષ રાખશો તો આવું જ અનુભવશો .. કવિતાના માધ્યમ દ્વારા સુંદર  સંદેશ  હું તમારી સાથે સમંત થાવ છું

પદ્મશ્રી દુલા ભાયા કાગ

મિત્રો

આજે જ્યારે દુલા ભાયા ‘કાગ’ની પુણ્યતિથિ છે ( અવસાન – 22-2-1977)

ત્યારે દુલા ભાયા કાગ !તમે કેમ યાદ ના આવો ?

કવિશ્રી દુલા ભાયા કાગ -”કાગબાપુ”-અમે તમારાં ભજનો ગાઈને તમને યાદ કરીએ છીએ. !હૈયાનાં ઉંડાણોમાંનો આ અતિથિ સત્કારનો સાદ ઝીલવાની અને સાચવીને ઉપયોગમાં લેવાની શક્તિ અને બુદ્ધિ પરમ કૃપાળુ પરમેશ્વર સૌને અર્પે!એ એમને માટે સાચી અંજલિ બનશે

કવિ કાગની પુણ્યતિથી છે. તેમને આપણી શ્રદ્ધાંજલી. માણીયે તેમનું આ ગીત.

 

અભિષેક: આવકારો મીઠો આપજે – દુલા ભાયા ‘કાગ’ અભિષેક

 

તારે આંગણિયે કોઇ આશા કરીને આવે રે…
આવકારો મીઠો….આપજે રે …. જી….
તારે કાને કોઇ સંકટ સંભળાવે રે…
બને તો થોડું……કાપજે રે…. જી…..

માનવીની પાસે કોઇ…..માનવી ન આવે… રે…..
તારા દિવસો દેખીને દુઃખિયાં આવે રે….
આવકારો મીઠો….આપજે રે ….જી….

કેમ તમે આવ્યા છો?…. એમ નવ કે’જે…..રે…
એને ધીરે રે ધીરે તું બોલવા દેજે રે..
આવકારો મીઠો…..આપજે રે…..જી…

વાતું એની સાંભળીને….આડું નવ જોજે….રે….
એને માથું રે હલાવી હોંકારો દેજે રે..
આવકારો મીઠો…..આપજે રે….જી….

પેલા એને પાણી પાજે……સાથે બેસી ખાજે….રે…..
એને ઝાંપા રે સુધી તું વળાવા જાજે રે…
આવકારો મીઠો…. આપજે રે….જી….

મિત્રો વધુ  વિગત  દુલા ભાયા કાગ  વિષે….કસુંબલ ગીતોનો વૈભવ કસુંબલ ગીતોનો વૈભવ

અમને વહાલી ગુજરાતી-ગિરીશ પરીખ

 

મિત્રો ,
આજે વિશ્વ માતૃ ભાષા ની ઉજવણીમાં ચાલો  એ સરસ મજાની કવિતા માણીયે.. આ કવિતાના  કવિ નો  પરિચય  તેમની પોતાનું લખાણ અને કવિતા છે.. ગિરીશ પરીખ ગુજરાતી અને અંગ્રેજીમાં લખતા સ્વતંત્ર લેખક અને પત્રકાર છે  એમની ગુજરાતી કૃતિઓ અમેરિકામાંથી પ્રગટ થતાં “સંદેશ”, “ગુજરાત ટાઈમ્સ”, “ગુજરાત સમાચાર”, “ગુજરાત દર્પણ”, “ગુર્જરી ડાઈજેસ્ટ”, “ગુંજન”, “અમેરિકન ગુજરાત”, વગેરે સમયિકોમાં પ્રગટ થઈ છે…..

મિત્રો આજની એમની કવિતામાં  એક ગુજરાતી તરીકે એમનો પરિચય કરશું ….ગીરીશભાઈએ  એમની કવિતામાં ગુજરાતી ભાષા માટે ખુબ જ સરસ શબ્દ પ્રયોગ કર્યો છે

અને તે છે ….માબોલી ગુજરાતી…માતૃભાષા માટે  કેટલી નિકટતા ..એક શબ્દ પ્રેમ અને ગૌરવ અને મારપણાં    અહેસાસ કરાવે છે ..  ગિરિશભાઈ એ હદય  થી ત્વરિત ઉભરતા વિચારોને શબ્દો થી સજાવ્યા વગર સરળ રીતે રજુ કર્યાં છે..સહજ રીતે બોલવાની ભાષામાં  નીકળેલાં શબ્દો એજ  એમની ખૂબી  છે  અને એજ  આપણી માત્રુ ભાષા ..

 

અમને વહાલી ગુજરાતી

છે માબોલી ગુજરાતી
અમને વહાલી ગુજરાતી

હેમચંદ્રની ગુજરાતી
નરસિંહ મીરાંની ગુજરાતી
વીર નર્મદની ગુજરાતી
ગાંધીગીરા છે ગુજરાતી
સહુ કોઇની ગુજરાતી
ધન્ય ધન્ય છે ગુજરાતી

સમજીએ સહુ ગુજરાતી
બોલીએ સહુ ગુજરાતી
વાંચીએ સહુ ગુજરાતી
લખીએ સહુ ગુજરાતી

છે માબોલી ગુજરાતી
અમને વહાલી ગુજરાતી.

માબોલી: માતૃભાષા

(ગિરીશ પરીખ મોડેસ્ટો, કેલિફોર્નિયામાં વસતા સ્વતંત્ર લેખક અને પત્રકાર છે.

એમનું પુસ્તક આદિલના શેરોનો આનંદઃ

આદિલ મન્સૂરીના ૭૨ શેરો અને એમના વિશે રસમય વાંચન મે ૧૮, ૨૦૧૧, આદિલના ૭૫મા જ્ન્મદિને પ્રગટ થશે.

E-mail: girish116@yahoo.com . Blog: www.girishparikh.wordpress.com .)

મારે ફરી એકવાર શાળાએ જવું છે.

મિત્રો ,.

અમારા મિત્ર નગીનભાઈ એ એક સુંદર કવિતા મોકલી છે .

તો ચાલો  ગમતના ગુલાલ  ગુલાલ કરીએ ..

આ કવિતા મારી શાળા ને યાદ કરીને ..

અને મારી ગુજરાતી ભાષાનો જશ હું આપી શકું  તેવા મારા શિક્ષિકા ભાનુબેન શેઠ ..

અને  સુશીલાબેન  જેણે મને ભણાવી  ને આજે આ સ્થાને પોહચાડી ..

.નાના હતા ત્યારે જલ્દી મોટા થવું હતું…આજે જયારે મોટો થયાત્યારે સમજાય છે કે “તૂટેલા સ્વપ્નો” અને “અધુરી લાગણીઓ” કરતા “તૂટેલા રમકડા” અને “અધૂરા હોમવર્ક” સારા હતા.. આજે સમજાય છે કે જયારે “બોસ” ખીજાય એના કરતા શાળા માં શિક્ષક હિંમતભાઈ “અંગુઠા” પકડાવતા હતા એ સારું હતું… આજે ખબર પડી કે ૧૦-૧૦ રૂપિયા ભેગા કરી ને જે નાસ્તાનો જે આનંદ આવતો હતો એ આજે “પીઝા” મા નથી આવતો…

ફક્ત મનેજ નહી આપણે બધાને ફરી સ્કુલે જવું છે .

ખરું ને ?

 

મારે ફરી એકવાર શાળાએ જવું છે ..

દોડતા જઇને મારી રોજની બાંકડીએ બેસવું છે

રોજ સવારે ઊંચા અવાજે રાષ્ટ્ર્ગીત ગાવું છે

નવી નોટની સુગંધ લેતા પહેલાં પાને

સુંદર અક્ષરે મારું નામ લખવું છે

મારે ફરી એકવાર શાળાએ જવું છે…

રિસેસ પડતાં જ વોટરબેગ ફેંકી

નળ નીચે હાથ ધરી પાણી પીવું છે

જેમ-તેમ લંચબોક્સ પૂરું કરી

મરચું – મીઠું ભભરાવેલ આમલી – બોર – જમરૂખ – કાકડી બધું ખાવું છે

સાઇકલના પૈડાની સ્ટમ્પ બનાવી ક્રિકેટ રમવું છે

કાલે વરસાદ પડે તો નિશાળે રજા પડી જાય

એવા વિચારો કરતાં રાતે સૂઇ જવું છે

અનપેક્ષિત રજાના આનંદ માટે

મારે ફરી એકવાર શાળાએ જવું છે…
છૂટવાનો ઘંટ વાગવાની રાહ જોતાં

મિત્રો સાથે ગપ્પાં મારતાં વર્ગમાં બેસવું છે

ઘંટ વાગતાં જ મિત્રોનું કુંડાળું કરીને

સાઇકલની રેસ લગાવતાં ઘેર જવું છે

રમત-ગમતના પિરિયડમાં તારની વાડમાંના

બે તાર વચ્ચેથી સરકી બહાર ભાગી જવું છે

તે ભાગી જવાની મોજ અનુભવવા

મારે ફરી એકવાર શાળાએ જવું છે…

દિવાળીના વેકેશનની રાહ જોતાં

છ-માસિક પરીક્ષાનો અભ્યાસ કરવો છે

દિવસભર કિલ્લો બાંધીને માટીને પગથી તોડી

હાથ ધોયા વિના ફરાળની થાળી પર બેસવું છે

રાતે ઝાઝા બધાં ફટાકડા ફોડ્યા પછી

તેમાંથી ન ફૂટેલાં ફટાકડા શોધતાં ફરવું છે

વેકેશન પત્યા પછી બધી ગમ્મતો દોસ્તોને કહેવા

મારે ફરી એકવાર શાળાએ જવું છે…

કેટલીય ભારે જવાબદારીઓના બોજ કરતાં

પીઠ પર દફ્તરનો બોજ વેંઢારવો છે

ગમે તેવી ગરમીમાં એરકંડીશન્ડ ઓફિસ કરતાં

પંખા વિનાના વર્ગમાં બારી ખોલી બેસવું છે

કેટલીય તૂટફૂટ વચ્ચે ઓફિસની આરામદાયક ખુરશી કરતાં

બે ની બાંકડી પર ત્રણ દોસ્તોએ બેસવું છે

બચપણ પ્રભુની દેણ છે – તુકારામના એ અભંગનો અર્થ

હવે થોડો સમજમાં આવવા માંડ્યો છે

એ બરાબર છે કે નહીં તે સરને પૂછવા..છે

મારે ફરી એકવાર શાળાએ જવું છે..

અમી દવે પટેલ

વેલેન્ટાઈન ડે-પૂછવું જ શું ?

 

મિત્રો ફેબ્રુઆરી મહિનો એટલે પ્રેમની મોસમ …..પછી તો પૂછવું જ શું ?..
હા આવા  પ્રશ્ન સાથેની મેઘલાતામાસીની એક સરસ મજાની કવિતા લાવી છું. .

માસીની એક ખૂબી છે  એ શબ્દોને ગમે ત્યાં વાપરીને કવિતામાં સજાવી શકે છે ..પ્રશ્નાર્થ ચિન્હ દરેક બે પંક્તિ એ વાપર્યા છે .પરંતુ જેમાં  હરેક પશ્ન એક મોન નો જવાબ છે .. પૂછવું જ શું ?થી વાત અધુરી નથી પ્રેમની પૂર્ણતાનો  અહેસાસ છે …

શરમાય ને પ્રેમ કેવી રીતે થાય એ ખુજ સુંદર રીતે રજુ કર્યું  છે ..પ્રેમને પાંગરવા માટે શબ્દો નો કે વાચા ની જરૂર નથી ….અમે નજરો થી જોઈને તમને કર્યે પ્રેમ અને તમે જવાબ વાળો મોંન  થી .. તો ચાલો પ્રશ્ન પૂછીને પ્રેમનો અહેસાસ  માણીયે..

પૂછવું જ શું ?
અમે સામું જોયું ને તમે શરમાઈ  ગયાં
ને પછી વાતો કરવાનું તો પૂછવું જ શું ?
અમે કેમ છો ?કહું  ને તમે લજવાઈ ગયાં
ને પછી આગળ તો પૂછવું જ શું ?
અમે મોગરો ધર્યો ને તમે મહેકી ઉઠ્યાં
ને પછી ગજરો ગૂંથવાનું તો પૂછવું જ શું ?
અમે પાણી માગ્યું ને તમે વરસી પડ્યાં
ને પછી બીજા કશાનું તો પૂછવું જ શું?
અમે હોઠે  મલક્યાં ને તમે છલકી  પડ્યાં
ને પછી છલકે ભીંજાવાનું તો પૂછવું જ શું ?
અમે નજર્યું નાંખી ને તમે ડૂબી ગયાં
ને પછી દરિયો તરવાનું તો પૂછવું જ શું ?
અમે હળવે પૂછ્યું ને તમે હસી પડ્યાં ,
ને પછી ‘હા’ ‘ના’કહેવાનું તો પૂછવું જ શું ?

જુઓ વર્લ્ડ કપની વેળા થઈ

મિત્રો ,
જેમ આપણી ગુજરાતી ભાષા આપણુ ગૌરવ છે તેમ cricket  પણ આપણુ ગૌરવ છે .. તો મિત્રો આજે એક  સુંદર કવિતા લાવી છું ..સ્વપ્ન જેસરવાકર   ( ગોવિંદ પટેલ )ની ..વાંચીને ચોગ્ગા છગ્ગા  મારવાનું મન થશે . અને હા દઈ,ભઇ,કઈ ,લઇ ,જઇ ,થઇ નો પ્રાસ એટલો સુંદર બેસાડ્યો છે કે આપને પણ જોડાવાનું મન થાય .. 

રાણી  રાજના એ બધા કંઈ, બતાવી દો બધા એક થઇ…

બાપુની દાંડીએ નાસ્યા ગઈ,ખેરવજો એમની  દાંડી અંઈ..

આવી સુરાતન ચડે એવી પંક્તિ  વાંચી વર્લ્ડ કપને જીતી ને લાવવાનું જોમ ચડ્યા વગર ન  જ રહે …તો ચાલો વર્લ્ડ કપને કવિતામાં માણીએ. અને શબ્દોથી ચોગ્ગા છગ્ગામારતા આપણાં કવિને comment  થી આપણાં બ્લોગ પર વધાવી એ ….

જુઓ વર્લ્ડ કપની વેળા થઈ, જાગોને મારા ધોની ભઈ

થાકનાં બહાનાં  ચાલશે નંઈ, જાગોને મારા ધોની ભઈ

હાથમાં બેટ બોલ  લઇ, ફરકાવો પતાકા ભારતની ભઈ

મામા માસીના સામે છે ભઈ એમને પટકો હાર જ દઈ

રાણી  રાજના એ બધા કંઈ, બતાવી દો બધા એક થઇ

બાપુની દાંડીએ નાસ્યા ગઈ,ખેરવજો એમની  દાંડી અંઈ

બન્ટી બબલીના સહોદર સઈ, રોજ કનડતા અમને રઈ

રોજ ફોલી ખાતા ઉંદર   થઇ, બતાવો એમની જગા કંઈ

ત્રિરંગાના તણખા વેરો અંઈ,ચોગ્ગા છગ્ગા કેરી ચોટ દઈ

ખુબ કમાયા છો ભારત મંઈ ,કરજ ચુકવવાની વેળા  થઇ

ત્યાસીના વર્ષને દોહરાવો  અંઈ, અગિયારનું  યાદગાર ભઈ

અબાલ વૃદ્ધની એક ઈચ્છા અંઈ, લાવો વર્લ્ડ કપને જીતી જઈ

વેલેન્ટાઈન ડે

મિત્રો,

વેલેન્ટાઈન ડે પ્રેમની અભિવ્યક્તિ કરવાનો દિવસ

વેલેન્ટાઈન ડે નિમિત્તે જયાબેનની સુંદર  રચના લાવી છું

એમણે વેલેન્ટાઈન ડે ને   ઉત્સવ દરીકે વર્ણવ્યો છે .

પ્રેમથી સમજવા અને સમજાવવાનો એમનો આ પ્રયત્ન છે..

પ્રેમનું વલણ અને પ્રેમની દષ્ટિને ખુબ જ સરસ રીતે આલેખી છે...

પ્રેમનો અનુભવ ક્યાં ક્યાં થઇ શકે.જ્યાં જ્યાં થાય અને જયારે થાય એજ વેલેન્ટાઈન ડે..

 

એજ  વેલેન્ટાઈન ડે

કરી જો તું  પ્રભુ ને પ્યાર  એજ  વેલેન્ટાઈન ડે..

રડતા  બાળક ને હસાવી જો  એજ વેલેન્ટાઈન ડે

દુખ ને પણ માન પ્રભુ નો પ્રસાદ  એજ  વેલેન્ટાઈન ડે

ને  સુખ ને સહુને  વહેંચતો જા એજવેલેન્ટાઈન ડે

વૃદ્ધ માં બાપ ને દેજે મીઠો ટહુકો એજ  વેલેન્ટાઈન ડે 

 

ને સ્વજનો ના સ્નેહ ને રાખજે મહેકતો એજ   વેલેન્ટાઈન ડે 

 

પડકારો ને હિંમત  થે દેજે હોંકારો  એજ   વેલેન્ટાઈન ડે 

 

ને શાંતિ માટે  હાથ  જોડનારો એજ   વેલેન્ટાઈન ડે 

 

શોભે જીવન માં પ્રારબ્ધ પૈસો ને પ્રેમ એજ   વેલેન્ટાઈન ડે 

 

જનની  , જન્મભૂમી અને દેશ ને કરીએ પ્રેમ એજ   વેલેન્ટાઈન ડે

ઓમ માં ઓમ

જયા  ઉપાધ્યાય

ઓમ માં ઓમ

જયા  ઉપાધ્યાય

૧૦૬૫  વેસ્ટ હિલ્લ કોર્ટ

કેલીફોર્નીયા અમેરિકા- ૪૦૮-૯૪૫-૧૭૧૭

વસંત

મિત્રો ,
વસંત – પ્રકૃતિનો નવો જન્મ.આખી પૃથ્વી જાણે એક નવી નવેલી દુલ્હન..
પાનખર પછી વસંત આવે જ છે.. એ કુદરત નો ઇશારાને  સમજવાની વાત આજે પદ્મામાસી   કવિતામા    લાવ્યા છે .. માત્ર બાહરી વસંતની  વાત નથી  , પણ આપણી અંદરમાં વસતા  બારમાસી વસંત નો વસવાટ,   અહેસાસ ની વાત કહી  છે

લોકો વૃદ્ધત્વને પાનખર કહેતા હોય છે  જ્યરે માસી  ને આજે આ ૮૦ વર્ષ ની ઉંમરે પણ  પ્રેમ તથા શ્રદ્ધાથી સદા વાસંતી રહે..  અને એટલે જ કહે છે..
પળમાં વહી જાશે જો વસંત , જીવનનો આનંદ આપી .
ક્ષણ ભંગુર છે જીવન  મારૂ,  વસંત ના રંગમાં હું તો મહાલી

.
જિંદગી ની વર્તમાન પળને માણો.

વસંત

વસંત આવી,  ધરતી  પર રંગ  બેરંગી ફૂલડાં લાવી

પંખીડાનો કલરવ લાવી, ભ્રમરનો ગુંજારવ  લાવી 

 

આંબે લીંબુ અને જાંબુ પર, સુગંધીત પુષ્પો લાવી

વૃક્ષ વેલ પર ખાટા મીઠા જાત જાતના ફળ લાવી

વરકન્યાના લગ્નની ઉત્તમ એક શુભ મોસમ આવી

માતપિતાના  સંતાનોના કરિયાવરની વેળા  લાવી

બેન્ડવાજા ઢોલત્રાંસા ને  લગ્ન ગીતની મોસમ આવી

માંડવો,   રોશની અને વરઘોડાની  સુંદરતા  લાવી.

પ્રભુતામાં પગલા ભરતા વરકન્યાની અભિલાષા લાવી .

વસંત પંચમી’ સપ્તપદીના સંગમથી સુખી સંસાર લાવી

કુદરતના આ સંકેત ને સમજતા  મને વાર ન લાગી
વસંત ઋતુઓની રાણી,  હૈયામા વસંતની   ઓળખ લાવી.

કોણ ક્હે છે હું પાનખર છું ..હું  તો   સદા બહાર સોહાગી
ભીતર માં છે વસંત મારા , બસ એ  નવી  ઊર્મિઓ  લઇ ને હાલી

આ અણમોલ ઘડીને માણી,જાણી ને,હું વસંત પથ પર ચાલી .
મારે કરવા  જતન વસંતના, આજ  નિર્મળ મનથી હાલી.

પળમાં વહી જાશે જો વસંત , જીવનનો આનંદ આપી .
ક્ષણ ભંગુર છે જીવન  મારૂ,  વસંત ના રંગમાં હું તો મહાલી ..
પ્રભુ, હું તો સદાય વસંત ના રંગમાં મહાલી…

પદ્માબેન કનુભાઈ શાહ