શુભેચ્છા સહ-(11) કુન્તાબેન શાહ –

       આ ઘડી, મારા અંતરથી તમને મનની શાંતિ, તંદુરસ્તી, મિત્રતા તથા જીવન સુધી ઉન્નતિ મળે તેની પ્રભુને પ્રાર્થના કરું છું.

શુભેચ્છા સહુને સાંભળવી  અને વાંચવી ગમે છે.
બાળકોનાં સ્મિત તથા કલરવ, સુંદર મઘમઘતા ફૂલો, મેઘધનુષ, કળા કરતા મોરને જોઇ, માતા, પિતા, દાદાજી, દાદીજી, નાનાજી, નાનીજી ની મમતાના સંભારણા, સહોદર, મિત્ર અને જીવનસાથી સાથે સંપનો ખળખળતો ઝરણાં જેવા પ્રવાહમાં ભીંજાતા હોઇએ ત્યારે શાનો અનુભવ થાય છે?  પ્રભુના આશિષનો અને સ્રુષ્ટિની ઉદારતાનો.  મારે માટે શું સારુ એ પ્રભુ સિવાય કોણ જાણે છે?
કોઇ પણ પ્રસંગ હોય,  દિવાળી, બેસતું વર્ષનાં અભિનંદન અને નવુ વર્ષ વધુ સુખદાયિ નિવડે, જન્મ દિવસની વધાઇ, લગ્નમાં કુર્યાત સદા મંગલમ, લગ્નની તિથી, નવશિષુનો જન્મ કે તારીખની વર્ષગાંઠ, કે હાઇ સ્કુલ, કોલેજ કે નોકરીમાંથી  નિવ્રુત થયા હોય ત્યારે વળી જુદી રીતના અભિનંદન, નવા ઘરમાં રહેવા ગયા હો ત્યારે પણ અભિનંદન તથા કોઇની તબિયત સારી ન હોય કે કોઇ પ્રભુને પ્યારુ થયું થયુ હોય ત્યારે
સ્વજનોને સહનશીલતા તથા શાંતિના આશિર્વાદ.   જુદી જુદી રીતે સજાવેલા હજારો શબ્દો આ ભાવનાંમાં જ સમાઇ જાય છે.
કહેવાય છે કે “સતી હોય તે શ્રાપ દે નહી અને શંખણીના લાગે નહી”.  તેમ જ ઠાલી શુભેચ્છાનું કોઇ મુલ્ય નથી  તેમ જ વ્હાલાઓનાં બોલ્યા વગર કે વાંચ્યા વગરનાં શબ્દો પણ આશિર્વાદ જ હોય છે.  આપણે ત્યાં, આપણાં સ્વર્ગસ્થ સ્વજનોને આવા દિવસે આપોઆપ યાદ કરીએ છીએ અને એમનાં આશિર્વાદ કે શુભેચ્છા છે જ એવું માનીને ખુશ થઇએ છીએ.  વિમાસણ થાય જ્યારે કે ખાસ કરીને વેસ્ટર્ન વર્લ્ડ્ના રિવાજ પ્રમાણે નોકરીમાંથી કે સંગતમાંથી કોઇ છુટ્કારો આપે ત્યારે પણ “વિષ યુ ધ બેસ્ટ” કહે છે.  આધ્યામિક્તા એ લોકોના જાણે જીન્સમાં વણાઇ ગઇ છે.  શ્રધ્ધાળુ લોકો માને જ છે કે જે થાય તે સારા માટે જ થાય છે.  આપણે પણ વ્યાકુળ થવાને બદલે, શું અને કેવી રીતે, ભુલો થઇ હોય તો  તે સુધારીને આગળ સ્વસ્થતાથી પગલું લેવું જેથી, શુભેચ્છા ફળે.  જે સમે જે મળ્યુ તે પ્રભુનો પ્રસાદ અને જેમણે શુભેચ્છા દર્શાવી તે પ્રભુના
સંદેશવાહક.
દરેક વ્યક્તિ સ્વાસ્થ્ય ચાહે છે, સ્વજનોની ઉષ્મા ઝંખે છે, સ્વાવલમ્બી, સ્વાભિમાનથી જીવન વિતાવવાનું પસંદ કરે છે અને પોતાના અભ્યાસ, વ્યવસાય અને શોખની પ્રગતિ માટેની મહેનત સફળ થાય તે માટે આશિશ, શુભેચ્છા માગે છે.
બસ આનંદમાં રહો અને તમારી અને તમારે માટે પ્રભુની ઈચ્છા સરખી જ હો એ શુભેચ્છા સાથે વિરમું.

કુંતા શાહ 

“શુભેચ્છા સહ”-(10)પ્રજ્ઞા દાદભાવાળા

  • શુભેચ્છા-માથા પરનો હાથ..
  • ઈચ્છા અને શુભેચ્છા ને ખુબ સંબંધ છે.
  • શુભેચ્છા એજ તો ઈચ્છાનું સર્જન છે.
  • અને ઈચ્છાપુર્તીનું સાધન છે.
  • શુભેચ્છા માનવતાનું ઉદાહરણ છે.
  • મંગલસૂચક છે.,કલ્યાણની ભાવના છે.
  • શુભેચ્છા ના મૂળ અને ફળ શુભ, મધુર અને મંગલકારી છે
  • અમીની દૃષ્ટિ  છે..
  •  શુભેચ્છા સ્વસ્તિવચન છે.
  • તુષ્ટિવચન છે,
  • પ્રભુનો સ્પર્શ છે.
  • માનવીના બે ખુલા હાથોમાં શુભેચ્છા આવે ત્યારે ખોબો ભરાય જાય છે.
  • મેઘધનુષ્ય રચાય છે.ડુંગરા ઓળંગી જવાય છે.
  • જીવન વહેવા માંડે છે.શરીર ઉર્જા થી ભરાય છે.
  • શુભેચ્છા પોષણ આપે છે.કરુણાનો દીપક પ્રગટાવે છે.
  • સંવેદના ની સરવાણી ફૂટે છે.
  • શુભેચ્છા માનવીની તાકાત છે.
  • ઉજળા ભવિષ્યનો આવાહન છે.
  • કુદરતને પડકાર છે.
  • પોતીકો વિશ્વાસ છે.
  • હ્ય્દયમાંથી નીકળતી અભિવ્યક્તિ છે.
  • માનવને અહેસાસ કરાવે છે.કે તમે એક જીવંત,ધબકતા માનવી છો.
  • શુભેચ્છા સાંભળવી કાનને ગમે છે.આંખો ને વાંચવી ગમે છે.
  • માનવી શુભેચ્છા નો ભુખ્યો છે.
  • માનવીના હ્ય્દયને, સખત થતું અટકાવે છે.માનવતા ને પ્રજ્જવલિત રાખે છે,
  • શુભેચ્છા માનવીના જીવનનો ઔંશ છે.જીવનમાં અભિન્નપણે ગૂંથાયેલી છે.
  • શુભેચ્છા શબ્દો દ્વારા અભિવ્યક્તિ પામે છે.ક્યારેક કાર્ડ તો ક્યારેક ફુલો બની આવે છે.
  • દિવાળીમાં સાથીયા ને તોરણ જ શુભેચ્છા બને છે,તો  શુભ: લાભ: ઘરના ઉંબરા ને વધાવે છે.
  • ભેટ પણ શુભેચ્છાનું સ્વરૂપ છે.વિદ્યાર્થી માટે શુભેચ્છા બળ છે.
  • દર્દી શુભેચ્છાથી જીવે છે.માંના હાલરડામાં શુભેચ્છાનો  સંકેત છે.
  • શુભેચ્છા આંખની ભીનાશ રૂપે ટપકે છે.રાખડીમાં  બંધન જ શુભેચ્છા છે.
  • “અખંડ સૌભાગ્યવતી” શુભેચ્છા છે.જે કુમ કુમ ભાગ્ય લાવે છે.
  • અચાનક ખરતો તારો શુભેચ્છા બને છે.
  • હ્ય્દયના ઊંડાણમાંથી ફૂટી નીકળતી મંગળ ભાવના છે.
  • શુભેચ્છા મેળવતો માનવી ભાગ્યશાળી છે.
  • પણ હવે દુર્લભ કેમ  થઈ રહી છે.?ક્યાંય દેખાતી નથી,
  • શબ્દો છે,ફુલ છે,સાથીયા અને તોરણ પણ છે.
  • હાર્દિક શુભેચ્છા હવે ,માત્ર શુભેચ્છા છે.
  • અંદરની ભીનાશ વિના શુભેચ્છા કોરી છે.
  • sms ,email ,કાર્ડ બધું મોનોટોનસ છે.
  • ટેપરેકોર્ડ માં વાગતા હાલરડામાં સંવેદનાની ખામી છે.
  • શુભેચ્છા હવે સમાજ,વ્યવહાર,દેખાવ અને વેપાર છે.હા માત્ર વેપાર છે.
  • communication ,અને formality છે.
  • શુભેચ્છાએ કાર્ડના વાઘા પહેર્યા છે.
  • હાથ હવે ફુલ બની ને આવે છે.
  • જય શ્રી કૃષ્ણ નું સ્થાન હવે માત્ર good morning પ્રણાલી છે.
  • લુપ્ત થતી શુભેચ્છા હવે Best of luck  છે.
  • માત્ર અભિવાદન છે.
  • અને “શુભેચ્છા” હવે “સહ”ને થઇ આવે છે.
  •                         with best compliments છે.બધું ફોર્મલ ફોર્મલ છે. ……..                    
  •    પણ માથા પરનો હાથ…
  • બોલ્યા વગર ઘણું કામ કરે છે.
  • સાચા હૃદયથી એક લાગણી
  • એક હૃદય ની શુભ સંવેદના
  • રૂ -બ- રૂ જોડાણ છે   
  • એજ શુભેચ્છા છે.
  • અને એજ સાચી શુભેચ્છા છે.
  • પ્રજ્ઞાજી -પ્રજ્ઞા દાદભાવાળા

“શુભેચ્છા સહ”(10)પલક આશિષ વ્યાસ

Slide11મિત્રો  ,આપ સહુ નિહારીકાબેન થી તો પરિચિત છો અને એમની અભિવ્યક્તિ પણ ખુબ સુંદર હોય છે ,તો આજે એમની દીકરી પલક જે બે એરિયાની ખુબ જાણીતી ગાયિકા છે જે  બેઠકમાં પણ આવી છે  અને એણે  સંગીતની સુંદર રજૂઆત કરી છે એના વિચારોની અભિવ્યક્તિ આજે આપ માણો।.. અને વાચ્યા પછી જરૂરથી કહેશો કે કહે છે ને મોરના ઈંડા ને ચિતરવા ન પડે….. 

શુભેચ્છા સહ…….

 

માલવણ નામના ગામ માં વિધવા શાન્તાબહેન રેહતા હતા. તેઓ ભણેલા નહિ હોવાથી ગામ માં લોકો ના ઘર ના કામ કરી ગુજારો કરતા હતા. તેમની એક દીકરી મીના પણ તેમને કામ માં મદદ કરતી અને ભણતી. મીનાએ ૧૦ ધોરણ સુધીનો અભ્યાસ કર્યો. પછી અભ્યાસ છોડી તે માતા ને કામ કરવામાં મદદમાં રેહતી. દીકરી મીના ને જુવાન થયેલી જોઈ શાંતાબહેન તેના લગ્ન ની ચિંતા કરતા હતા. મા- દીકરી તેજ ગામના ભીખુભાઈ શેઠને ત્યાં કામ કરતા. ભીખુભાઈ તેમના પત્ની અને દીકરો આમ ત્રણ નું સુખી જીવન હતું.

મીના નો સુશીલ સ્વભાવ જોઈ ભીખુભાઈ ના દીકરા નવીન ને તે પસંદ પડી ગઈ. નવીને તેના માતા- પિતાને મીનાને  પસંદ કરી અને લગ્ન માટે હા પાડી પરંતુ શાન્તાબહેન પાસે લગ્ન કરવા માટે રૂપિયા ન હતા તેથી તેઓ ખુબ દુઃખી હતા. આ વાત ની ખબર તેજ ગામમાં રેહતા ગંગાબા ને પડી. તે સામાન્ય સ્થિતિના હતા. તેઓ એ ૫૦૦૦ રૂપિયા એમની પાછલી જિંદગી માં અણધારી જરૂરિયાત માટે બચાવેલા હતા. તેમણે મીનાને ઘેર બોલાવી હાથમાં કવર આપ્યું. મીનાએ માતાને કવર આપ્યું. શાન્તાબહેને કવર ખોલ્યું તો તેમાં ૫૦૦૦ રૂપિયા હતા અને ચબરખી માં લખ્યું હતું કે શુભેચ્છા સહ  સ્વીકારશોજી.

પલક આશિષ વ્યાસ

“શુભેચ્છા સહ” (9)દર્શના વારિયા નાડકરણી

“શુભેચ્છા સહ” – With Best Wishes


આ વખતની “બેઠક” નો વિષય હતો “શુભેચ્છા સહ”. તે વિષય ઉપર નીચે રચના પ્રસ્તુત કરું છું.

નથી એવી કઈ જરૂર શબ્દોની, વગર શબ્દોએ ઘણું કહી શકાય છે
શુભેચ્છા, અભિનંદન, મમતા, લાગણી, ચિંતા, પ્રેમ દર્શાવાય છે

રાહના પત્થર તમારા ઘરની કોર જાય ને કાંકરે કાંકરે દિલ પીઘલતું
વાચા વગરજ નીચી પાંપણોમાં થી કેમનો પ્રેમ થઇ જાય છે

બાળકના મોઢામાં દુધની સેર પંહોચી નથી, કે ઉભરાય છે મમતા
તેને છ ફીટની કાયામાં જોયને એજ મમતા ગૌરવમાં બદલાય જાય છે

પ્યારી સહેલીના પ્રિય પાત્રને મળતા પહેલાજ થાય છે હર્શઘેલું દિલ
પ્યારભરી મસ્તીથી ચીડવવામાં જ તેને અભિનંદન પહોચી જાય છે

અને છતાય જે વર્તાવાય “શુભેચ્છા સહ” શબ્દોના સહારે
અમર થાય છે એ લાગણી જયારે તે શબ્દોમાં પીરસાય છે.

Home work assignment for this “bethak” meeting -(English translation)

Words are not required, without words, much can be said
Goodluck, love, concern, and worry can all be expressed

Each little stone on the path to your home, melts my heart
Without words, from under closed eyelids, heart has loved

Milk has not reached baby’s mouth, but heart overflows with awe
It changes into pride when into 6 feet man, the child is transformed

Before even meeting dear friend’s new love, heart feels happy
From teasing and jokes, good wishes are all conveyed

And yet, when with “best wishes” feelings are expressed
They live forever, when with words, emotions are served

http://darshanavnadkarni.wordpress.com/

શુભેચ્છા સહ…(8)વિનોદ પટેલ

 

શુભેચ્છા શબ્દ બે શબ્દોનો બનેલો છે – શુભ + ઇચ્છા . કોઈના પ્રત્યે સારી ઈચ્છા રાખો અને એને વ્યક્ત કરો એટલે શુભેચ્છા દર્શાવી એમ કહેવાય.

દરેક વ્યક્તિની શુભેચ્છા વ્યક્ત કરવાની નીતિ રીતી જુદી જુદી હોય છે.શુભેચ્છા એ પ્રેમ જેવી એક પ્રકારની હૃદયની લાગણી છે. હૃદયનો ભાવ છે.એ એક જાતનું પવિત્ર ભાવનું ઝરણું છે જે દરેકના હૃદયમાં વત્તા ઓછા અંશે વહેતું રહેતું જ હોય છે.

પૂજ્ય મુની ચિત્રભાનુની એક જાણીતી કાવ્યરચનાની આ બે પંક્તિઓમાં હૃદયનો કેટલો સુંદર ભાવ વ્યક્ત  થયો છે !…                મૈત્રી ભાવનું પવિત્ર ઝરણું મુજ હૈયામાં વહ્યા કરે

                   શુભ થાઓ આ સકલ વિશ્વનું એવી ભાવના નિત્ય રહે.

શુભેચ્છા અનેક માધ્યમો દ્વારા વ્યક્ત કરી શકાય છે. અન્યોન્ય મળીને વાણીથી, વડીલોને પ્રણામ જેવા શારીરિક હાવભાવથી,ઇન્ટરનેટમાં ઈ-મેલથી, આવી રીતે બ્લોગમાં કાવ્ય કે લેખ લખીને વિગેરે અનેક રીતે શુભેચ્છાઓ  પાઠવવામાં આવે છે .

દિવાળીના જેવા સપરમા પર્વ નિમિત્તે  સદીઓથી સગાંઓ, વ્હાલાંઓ, મિત્રો એક બીજાને શુભેચ્છાઓ પાઠવે છે અને અન્યોન્યની પ્રેમની લાગણીને બહાર લાવે છે.

ઋગ્વેદમાં એક ખૂબ જાણીતો શ્લોક છે :

आ नो भद्राः क्रतवो यन्तु विश्वतः’ 

જેનો અર્થ છે આખી દુનિયામાંથી જે શુભ અને સુંદર વિચારો છે તે દરેક દિશાઓમાંથી અમારામાં આવો.!

દરેક મનુષ્યે પોતાના જીવનને દીપોત્સવીના પર્વ જેવું પ્રકાશમય, આનંદ અને ઉલ્લાસભર્યું બનાવવા માટે એ જરૂરી છે કે એણે એના  ઈષ્ટદેવની આરાધના કરતી વખતે વિશ્વમાં જે કંઈ શ્રેષ્ઠ, સારૃં, સર્વોત્તમ છે એની મંગળ કામના કરવી પડે જે ઉપરના શ્લોકમાં સરસ વ્યક્ત કરવામાં આવી છે .આવી ઉન્નત ભાવનાઓ વ્યક્ત કરવી એ આપણી ભારતીય સંસ્કૃતિની એક દેન છે જેને જાળવી રાખવાની આપણી ફરજ બને છે.શુભેચ્છા વ્યક્ત કરીને જો આપણે કોઈના જીવનમાં ખુશી અને કોઇના હોઠો પર ફક્ત સ્મિત લાવી શકીએ તો પણ એ એક મોટી સેવા છે. એમાં જીવનની સાર્થકતા છે.આપણા વેદો અને પુરાણોમાં ઋષિ મુનીઓએ દરેક પ્રસંગોએ બીજાઓને આશીર્વાદ આપી શુભેચ્છાઓ વ્યક્ત કરવાનું શીખવ્યું છે. વડીલો દ્વારા દરેક શુભ પ્રસંગોએ અપાતા આશીર્વાદ એ શુભેચ્છાનું શ્રેષ્ઠ સ્વરૂપ છે. આવા આશીર્વાદ મળે એના જેવો આનંદ બીજો શું હોઈ શકે !નીચેના શ્લોકમાં જુઓ, આપણા ઋષિ મુનિઓએ કેટલી સુંદર શુભેચ્છાની લાગણી વ્યક્ત કરી છે !                                                          સર્વે ભવન્તુ સુખીન 

સર્વે સન્તુ નિરામયા:  

સર્વે ભદ્રાણી પશ્યન્તુ

મા કશ્ચિદ દુ:ખ માપ્નુયાત્  

ૐ શાંતિઃ શાંતિઃ શાંતિઃ

 

કવિ ઉશનસે પણ એમના એક કાવ્ય “ નુતન વર્ષ શાંતિ –સૂક્ત” માં આવી જ ભાવના રજુ કરી છે .

ક્યાંય ના જરી ક્લેશ હો; ને ક્યાંય ના જરી ક્લાન્તિ હો;

સર્વને હો તાઝગી પ્રાતઃફૂલોની, શાન્તિ હો.

વ્યોમમાંયે શાન્તિ હો, ને ભોમમાંયે શાન્તિ હો,

વ્યોમભોમની મધ્ય રોમેરોમ સોમ શી શાન્તિ હો.

જીવનની દરેક નવી સવાર નવી આશાઓ લઈને ઉગતી હોય છે . આખા દિવસ દરમ્યાન માણસ પોત પોતાના નિયત કામકાજ માં વ્યસ્ત રહે છે .રાત પડે એટલે એ નિંદ્રા દેવીના શરણે જપીને નિશ્ચિંત બનીને સુઈ જાય છે .એક રીતે એ એક પ્રભુ શરણું પણ બને છે .જ્યારે એ ઘસઘસાટ સુએ છે ત્યારે જાણે કે એ મૃત દશામાં હોય છે .જ્યારે સવારે જાગે છે ત્યારે એક નવા દિવસ માટે એનો ફરી જન્મ થાય છે .

આપણને સવારે જીવતા ઉઠાડવા માટે અને એની આ રોજના જન્મ-મરણની અદભુત લીલાઓ માટે ભૂલ્યા વિના પ્રભુનો પાડ માનીને આપણું રોજ બરોજનું કામ કરીએ તો કેવું સારું ! આપણા ઉપર અનેક ઉપકારો કરનાર કૃપાળુ પરમાત્મા ઉપર આટલી આભારવશતા તો આપણે જરૂર બતાવી શકીએ ..

અંતે, આ દીપોત્સવી-નવા વર્ષ નિમિત્તે જેની રચના થઇ એ મારું એક શુભેચ્છા કાવ્ય પ્રસ્તુત કરી આ લેખ પૂરો કરું છું.

 

નવા વર્ષે,નવેસરથી, નવલા થઈએ

 

સમય સરિતા હંમેશ વહેતી જ રહેતી,

જૂની યાદો પાછળ મૂકી વર્ષ એક થયું પસાર

આવી ઉભા એક નવા વર્ષને પગથાર.

જિંદગી આપણી છે એક ફળદાઈ ખેતર,

એમાં ઊગેલ ઘાસ નીદામણ દુર કરીને,

નવા વરસે પ્રેમનો નવ પાક ઉગાડીએ.

ખામીઓ, કમજોરીઓ હોય એ દુર કરીએ

નકારાત્મકતા છોડીને ,સકારાત્મક બનીએ.

નવા વરસે નવ નિર્માણનો સંકલ્પ કરીને,

નવલા વરસે નવલા બનીને ,નવેસરથી,

નવું વર્ષ હળીમળી પ્રેમથી સૌ ઉજવીએ,

નવી આશાનો દીપ જલાવીએ,પ્રકાશીએ.

કૃપાળુ પ્રભુને હંમેશાં હર પળ સમરીએ,

નવ વરસે, બે કર જોડી એને પ્રાર્થીએ કે ,

રિદ્ધિ, સિદ્ધિ,લક્ષ્મી અને સરસ્વતી માતા ,

સૌ પર રીઝે ,સુખ શાંતિ સૌ પ્રાપ્ત કરે ,

એવું ઉત્તમ નવું વર્ષ બનાવજે, હે પ્રભુ.

 

સૌને સ્નેહી મિત્રોને નવા વર્ષની અનેક પ્રેમભરી શુભેચ્છાઓ .

વિનોદ પટેલ ,સાન ડીયેગો , કેલીફોર્નીયા

શુભેચ્છા સહ (૭) ડૉ .લલિત પરીખ


Best wishes

કારણ વિના આપણા અનેક ધર્મોએ ઈચ્છાને દુઃખનું કારણ કહી આપણી  સ્વાભાવિક સહજ મનોવૃત્તિને વગોવી મૂકી છે. ઈચ્છા જન્મની સાથે જ જન્મે છે અને જીવન થી લઈને  મૃત્યુ સુધીની  મંગળ યાત્રામાં હુંફાળો સથવારો આપે છે.ઇચ્છા પોતામાં કાયમ શુભ જ હોય છે,પોતાનું અને બીજાઓનું શુભ જ ઈચ્છે છે.આપણી સેક્યુરિટીનું ધ્યાન રાખનાર ઈચ્છાને વગોવીને આપણે આપણી  જાતનું,આપણી આસપાસના જગતનું,પરસ્પર જોડાયેલા જ જોડાયેલા રહેવા ઈચ્છતા સંબંધોનું અકારણ અહિત કરી બેસીએ છીએ.પરહિતમાં  જ આપણું  હિત સમાહિત  છે એ અને એટલે જ ઇછાપ્રેરિત આપણું  દરેક કાર્ય, સ્વધર્મની રક્ષા કરતું રહી આપણી સાથે સમસ્ત જગતનું સદાસર્વદા   કલ્યાણ  કરતુ  રહી,જાતનો ,સમાજનો સતત  વિકાસ કરતુ રહ્યું છે.પ્રસ્તર યુગથી પવનયુગ સુધીની આપણી વિકાસયાત્રાના મૂળમાં આપણી,આપણા સહુ કોઈની શુભ ઈચ્છા જ માનવ વિકાસનું મજબૂત પાસું છે, એ જ મૂળ તત્વ છે એ તો દીવા જેવી ચોખ્ખી વાત છે.ભગવાન પણ સહુનું ભલું જ ઈચ્છે છે તો આપણી  અશુભ ઇચ્છા હોય તો ય અંતે તો દરેકનું શુભ જ શુભ થઈને રહેવાનું છે.

ઈચ્છા અશુભ હોઈ જ કેવી રીતે શકે?આપણું  મન,આપણું તન,આપણો આત્મા સદૈવ ‘સ્વાન્ત :સુખાય’ જ  સંચાલિત થાય છે,પ્રવૃત્ત રહ્યા કરે છે.સહુના હિતમાં જ નિજ હિત સમાહિત છે એ ચરમ -પરમ સત્ય આપણા મનને દોરે છે,આપણી  સાનને ઠેકાણે રાખે છે,આપણને સાચા અને ઊંડા આનંદનો અનુભવ કરાવે છે.સહુના કલ્યાણમાં જ આપણું કલ્યાણ છે એ સમજીને તો આપણે “સહુનું કરો કલ્યાણ પ્રભુજી,સહુનું કરો કલ્યાણ”એમ ગાતા આવ્યા છીએ,”સર્વે જના: સુખીનૌ  ભવંતુ” એમ પોકારતા રહ્યા છીએ.આપણે પાગલ નથી કે બીજાઓના ભલા,સુખ અને કલ્યાણના ગીતડાં ગયા કરીએ. આપણે  જે કંઈ વિચારીએ છીએ,કરીએ છીએ એ અંતતોગત્વા તો આપણા  સુખ માટે જ કરીએ છીએ.સહુના સુખમાં જ આપણું સુખ સમાહિત  છે એ બરાબર સમજેલા આપણા  મહાકવિઓ એટલે જ ગાતા રહ્યા:-“પર હિત સરિસ ધર્મ નહિ કોઈ “(તુલસીદાસ) “સહુનું કરો કલ્યાણ પ્રભુજી સહુનું કરો કલ્યાણ ” , “વૈષ્ણવ જન તો તેને રે કહીએ, જે પીડ પરાઈ જાણે રે”(નરસિંહ મેહતા).માતા બાળક માટે રાત રાત જાગે છે,ભૂખી તરસી રહે છે, એ પણ અંતે તો આ બધું પોતાના સુખ માટે જ કરે છે.બાળકનું દુખ પોતાનું દુખ બની જાય છે;બાળકનું સુખ પોતાનું સુખ બની જાય છે.આપણું પ્રત્યેક કાર્ય આત્મસુખ માટે જ હોય છે.પોતાનો અને પારકાનો ભેદ, અભેદમાં પરિણમી જાય છે,આપણો વસ્તાર આપણો   વિસ્તાર છે,આખું જગત, આખી જીવસૃષ્ટિ આપણો જ વિસ્તાર છે,આપણું જ પ્રતિબિંબ છે,હકીકતમાં એ બધું આપણે જ છીએ.એકમાં અનેક અને અનેકમાં એક જ આત્મતત્વ છે એ તો નિર્વિવાદ સત્ય છે.”બ્રહ્મ લટકા કરે બ્રહ્મ સામે” એ પણ સમજીએ તો આપણે  જ આપણા પ્રતિબિંબ સમાન સમસ્ત જગતના પદાર્થો અને જીવોને જોઈએ છીએ,અનુભવીએ છીએ.ભૂખ્યાને જમાડી જે ધરવ થાય છે,કોઈને સુખી કરીને જે સુખનો સાક્ષાત્કાર થાય છે એ આપણી  શુભ ઈચ્છાની જ ફલશ્રુતિ છે.સાહિત્ય પણ આપણને એ જ શીખવે છે,સમજાવે છે.સાધારણીકરણ આપણને પાત્રો સાથે,પરિસ્થિતિઓ સાથે એકરૂપતાનો અનુભવ કરાવે છે.સાહિત્યમાં પણ ‘સ્વ હિત’ અને ‘પર હિત સમન્વિત’ છે જ છે.સત્યમ,શિવમ અને સુંદરમનો સમન્વય શું સાહિત્યમાં અને શું જીવનમાં સમાહિત છે જ છે.

સમસ્યા એ છે કે આપણી જીવનદૃષ્ટિ સંકુચિત થઇ ગઈ છે,આપણી  વિચારસરણી સંકીર્ણ  થઇ ગઈ છે, માંકડું મન સાંકડું થઇ ગયું છે અને એટલે સ્વમાં સર્વને જોવાનું ભૂલી, સહુમાં  પોતાને જોવાનું ભૂલી પોતાના – પારકાના ભેદ કરવા માંડ્યા છીએ.

હકીકતમાં તો પોતે તો અત્ર તત્ર સર્વત્ર છે જ છે ;પણ દૃષ્ટિ એવી સૃષ્ટિના કારણે

‘અભેદ’માં ‘ભેદ’ જુએ છે.વહાલા-દવલાનું વિશ્વ ઊભું કરે છે.બાકી તો ઈચ્છા તો હમેશા, શું પોતા માટે શું,શું બીજા માટે શુભ જ શુભ હોવાની હોવાની અને હોવાની જ.અશુભ ઈચ્છા પણ અંતે તો પોતાનાઅને જીવ માત્રના,સમસ્ત જગતના  શુભ માટે શુભમાં જ પરિવર્તિત થવાની,એમ થઈને જ રહેવાની.અસત્યોમાંથી સત્ય તરફ સહજ સ્વાભાવિક રીતે જનારું આપણું મન,ઊંડા અંધારેથી તેજ જનારું આપણું મન શત પ્રતિશત અશુભમાં  થી શુભ તરફ જ જવાનું તેમાં લવલેશ સંદેહને સ્થાન નથી.કોઈનું અશુભ ભૂલથી,દ્વેષથી ,તિરસ્કારથી ઈચ્છો તો પણ શુભનું બળ એવું અને એટલું છે કે જેનું અશુભ ભૂલથી ઈચ્છ્યું હોય તો ય તેનું  તો શુભ જ શુભ થવાનું,થઈને જ રહેવાનું.વિકાસ,પ્રગતિ અને ઉન્નતિનું જોર એવું જબરું હોય છે કે અંતે તો શુભનો જ વિજય થઈને રહે છે.તેથી જ સહુનું શુભ ઇચ્છવું જોઈએ,”જા  સુખમ” કહેવું જોઈએ.ભગવાન તારું ભલું કરે એ જ મનમાંથી નીકળવું જોઈએ,જેથી આપણને પોતાને સારું લાગે,સામાને સારું લાગે અને પ્રભુ તો જે સારું કરવાના જ  છે, તો થોડો યશ આપણે પણ  પણ અનાયાસ કેમ કમાઈ ન લઈએ ?

ગમે તેટલું અંધારું ઉમટ્યું હોય -અમાસની રાતે; બીજી સવારે સૂર્યને,સૂર્યના પ્રકાશને જગતની કોઈ કરતા કોઈ તાકાત રોકી શકતી નથી-તેનું અજવાળું,તેનો ઉજાસ,તેનું તેજસ્વી તેજ ફેલાવવામાં.તે જ પ્રમાણે અશુભનું જોર કેટલું? શુભ જ બળવાન હોય છે, શુભ જ શક્તિશાળી હોય છે,શુભ જ વિકાસશીલ હોય છે એટલે “શુભેચ્છા સહ” તો આપણા શ્વાસોચ્છવાસ સમાન હોય છે,પ્રાણવાયુ સમાન હોય છે.શુભની દિશા અને દૃષ્ટિ નિશ્ચિત હોય છે.સુખડ બળીને ય સુગંધ જ પ્રસરાવે છે,પુષ્પ ચીમળાઈને ય સુવાસ જ ફેલાવે છે,મેહંદી પીસાઈનેય મહેકે છે,. તળાવ અને સમુદ્રનું જળ સૂર્યના કિરણોથી બળીને ય વાષ્પ બનીને પુન:વાદળ સ્વરૂપે જીવન સ્વરૂપે -જળ  સ્વરૂપે વરસે જ વરસે છે.તે જ પ્રમાણે અશુભ અંતતોગત્વા તો શુભ જ શુભમાં પરિણમીને રહે છે. તેથી જ “શુભેચ્છા સહ” માં શુભ જ શુભ સમાહિત છે જે આપણા  સહુના હિતમાં જ છે.તેથી હેતે હેતે ગાતા રહેવું જોઈએ કે “સહુનું કરો કલ્યાણ પ્રભુજી સહુનું કરો કલ્યાણ !” ‘શુભેચ્છા સહ’ની પાછળ “ઓમ સહના વવતુ, સહનૌ ભુનકતુ , સહ વીર્યમ કરવા વહૈ,તેજસ્વિના વધી તમસ્તુ,મા  વિદ્વિષા વહૈ,ઓમ શાંતિ:શાંતિ: શાંતિ: “. શુભેચ્છાનો સંદેશો શુભ જ શુભમાં પરિણામે છે એ મહા સત્ય છે,અચળ સત્ય છે, અડગ સત્ય છે,ચરમ અને પરમ સત્ય છે.એ સત્યની સામે અશુભનું વજૂદ કેટલું બધું બેવજૂદ છે?

ડૉ .લલિત પરીખ

 

(સમાપ્ત)

શુભેચ્છા સહ..(6)નિહારિકા શશીકાંત

ભારતીયો જ્યાં રેહતા હોય ત્યાં ભારતીય તહેવારો આનદથી ઉજવે છે. ભારતીયો નવુંવર્ષ કારતક મહિનાની એકમના દિવસે ઉજવે છે. આ દિવસે લોકો એકબીજાને શુભેચ્છા પાઠવે છે.

” નવુંવર્ષ દરેક વ્યક્તિને સુખદાયી, લાભદાયી, યશસ્વી નીવડે, ઉમંગો જીવનને નવો આનંદ આપી મધુરતાથી ભરી દે, આપણે બધા ધરતીમાતાની ઉદારતા અને આકાશ જેવી વિશાળતાથી એકબીજાને મદદ કરવા હંમેશા તૈયાર રહીએ. દરેકના જીવનમાંથી ભય, દુઃખ, નિરાશા નો નાશ થાય અને સુખશાંતિથી જીવન ખુશખુશાલ બને, ભગવાનની ભક્તિ કરી જીવનને આદર્શ બનાવીએ”
વિજ્ઞાનની પ્રગતિ સાથે દુનિયામાં અશાંતિ પણ વધી છે.” જે પોષતું તે જ મારતુ એવો દિશે ક્રમ કુદરતી.” તે પ્રમાણે અત્યારના જમાનામાં લોકો કુદરતે આપેલી અને બીજાઓએ આપેલી તેવી ઘણી મુશ્કેલીયોનો સામનો કરે છે ત્યારે શુભેચ્છા સાથે મારે એટલું જ કહેવું છે કે,” એકબીજા તરફ દેવ દ્રષ્ટિથી જુઓ, દરેક માં રહેલા દેવત્વને જાણી, એકબીજાનું મંગલ ઇચ્છો અને જગત માં માંગલ્ય વરસાવો, વિચાર વાણી અને વર્તનમાં એકતા આચરી એકબીજા ને આશીર્વાદ આપો. દરેકનું ભલું ઈચ્છો, એકબીજા ને મદદ કરી તારક બનો અને સર્વકલ્યાણ ઈચ્છી સુખી કરો. સત્કર્મ કરી જગત નું  કલ્યાણ કરો. મંગલકામનાઓથી જગતને તમામ સુખ શાંતિ  થી ભરી દો.”
આપણા ભારતદેશની મહાનતાના ગુણગાન ગાતા આપણા જીવનને મહાન બનાવીએ તેવી શુભેચ્છા સહ
નિહારિકા શશીકાંત વ્યાસ ના પ્રણામ

દિવાળીની શુભેચ્છા

મિત્રો દિવાળીના આ શુભ દિવસે ચાલો આજે ઘરના દ્વાર ખોલી, શુભ લાભના પગલા સાથે આવકાર નો દીપ પ્રગટાવીએ..ચાલો આપણે પણ દરેક ના જીવનને પ્રજવલ્લિત કરીએ  પ્રભુ પાસે પ્રાર્થના કરીએ કે દિવાળી ના દિવા જેવુ આપનુ જીવન પ્રકાશિત રહે..દિવાળી ના રંગ, મધુરતા, ઉજાશ, ઉલ્લાસ અને નવા વર્ષના સપનાઓ ચાલો  આપણે સાથે ઝીલીએ…

શબ્દોની  ની આતશબાજી કરીએ…

આપ સર્વેએ મારા નાનકડા દીવડામાં આપના સહકારથી દીપમાળા પ્રગટાવી છે..આખા વર્ષ દરમ્યાન સુંદર લખાણો  નો થાળ અને મધુર પ્રતિભાવોનો  અન્નકૂટ  આપે  પીરસી ને ભાષા ને જાગ્રત રાખી છે. ગુજરાતી સાહિત્યના અદભુત તારામંડળ “શબ્દોનુંસર્જન” બ્લોગમાં આપની  સમક્ષ રજુ કરતા મને પણ ખુબ આનંદ થયો છે  …  શબ્દોનાસર્જન પર આપનું હમેશા સ્વાગત છે.   આપ જ મારો પરિવાર છો માટે આપ સર્વેને ખુબ ખુબ અઢળક વ્હાલભરી દીવડાની જ્યોતભરી ,ઘૂઘરા અને મઠીયામા  પ્રેમભરી,તનક્તારા,ચકરડીમાં  ચકમક ભરી , રંગોળીના રંગભરી, સ્વજનના સંગભરી શુભેચ્છાઅને ખુબ શુભેચ્છા ।..સૌ વ્હાલા સર્જક અને વાચક મિત્રો/શુભેચ્છકો, તમને અને તમારા પરિવારજનો ને હ્રધ્યથી  ખોબલે ખોબલે દિવાળીના આ શુભ પર્વની  શુભકામના।   

પ્રજ્ઞાજી-પ્રજ્ઞા દાદભાવાળા 

Picture1શુભેચ્છા સહ નૂતન વર્ષાભિનંદન   ૨૦૭૧

બે હઝાર એકોત્તેરનું વર્ષ લાવે ઉમંગ, ઉન્નતિ ને ઉત્કર્ષ

કીર્તિ વળી ને મળે જશ, જન જનને મળે તન્દુરસ્તીની નસે નસ

તન દુરસ્તી મનમાં મસ્તી, લક્ષ્મીની કૃપા દૃષ્ટિ પ્રેમની પુષ્ટિ,

પ્રભુ ભક્તિમાં, ના રહે કોઈ ત્રુટી, પ્રજવલિત રહે હર  દિપની જ્યોતિ

બે હઝાર એકોત્તેરમાં સહુને રાખે હસતી,પંચામૃતની એ શક્તિ!

પરિવાર પ્રેમ  સહિત સહુને  પાઠવતી

અભિનંદન, અભિનંદન, નૂતન વર્ષાભિનંદન

પદમાં –કાન

શુભેચ્છા સહ-(6) કલ્પના રઘુ

શુભેચ્છા સહ એટલે સારી ભાવના સાથે કોઇના માટે સારું ઇચ્છવું તે. જે હંમેશા સકારાત્મક હોય છે અને અંતરથી અપાય છે. આપણે સામાન્ય દ્રષ્ટિકોણથી વિચારીએ કે કયારેક શુભેચ્છા આપનાર શણગારેલી ભાષામાં કે મોંઘી ભેટ કે કાર્ડ આપીને શુભેચ્છા વ્યક્ત કરે છે. પરંતુ જો અંદરથી તે વ્યક્તિ માટેની ખરાબ ભાવના હોય તો તે આપેલી શુભેચ્છા ફળતી નથી. તેવી રીતે સામેની વ્યક્તિ શુભેચ્છા સ્વેચ્છાએ સ્વીકારે નહીં તો તે વ્યક્તિ પોતાની જાતે એક દિવાલ ઉભી કરે છે. તેથી સામેની વ્યક્તિએ આપેલી શુભેચ્છા ફળતી નથી. આ એક હકીકત છે. મતલબ કે, શુભેચ્છા માત્ર ઔપચારિકતા પૂરતી અપાય તો તે કહેવાતી શુભેચ્છા જ રહી જાય છે. તે ફળીભૂત થતી નથી.

શુભેચ્છાનું એક વિજ્ઞાન છે. જે હું આપને વેદોની ભાષામાં સમજાવવા માંગું છું. બ્રહ્માંડ સ્પંદનોનું બનેલું છે. અને સ્પંદનો મનુષ્ય ઉત્પન્ન કરે છે. ભગવાને આપણને લાગણીઓ આપી છે. આ લાગણીઓ સાથે સ્પંદનો જોડાય છે ત્યારે વસ્તુ કે પરિસ્થિતિ ફલીભૂત થાય છે. તમે જે વિચારો તેને કોઇ ભાષા નથી હોતી. વેદોમાં કહ્યાં પ્રમાણે વાણી ૪ પ્રકારની હોય છે. પરા, પશ્યન્તી, મધ્યમા અને વૈખરી વાણી. પરા વાણી મૌનની, સિધ્ધોની, ઇશ્વરની વાણી છે. તે ચારેયમાં સૂક્ષ્મતમ છે. આપણે કોઇના માટે શુભેચ્છા કોઇ પણ રીતે વ્યક્ત કરીએ તો તે વ્યક્ત કરવામાં આવતી ભાષા ગમે તેટલી વરખ લગાડેલી હોય પરંતુ અંદરની ભાવના ખરાબ હોય તો તે ભાવની ભાષા માત્ર ઇશ્વર જાણે છે. અને તેજ ફલિભૂત થાય છે. આમ લાગણીથી જે સ્પંદનો ઉભા થાય છે એ બ્રહ્માંડમાં જાય છે અને તે ફલિભૂત થાય છે. પછી ભલે સામેની વ્યક્તિ હજારો માઇલ દૂર હોય. ભગવાન માત્ર સ્પંદન અને લાગણી સમજે છે. મનુષ્યની ભાષા નહીં. ટેલીપથીનો અનુભવ તો દરેકે કર્યોજ હશે. તમે જે દિલથી વિચારો તે બનીને  જ રહે છે.

આજકાલ શુભેચ્છાઓ આપવામાં નીત નવી વિવિધતાઓએ પ્રવેશ કર્યો છે. બે હાથ જોડીને શુભેચ્છા પાઠવવાથી માંડીને ફેઇસ બુક, વોટસ્‍ એપ કે ઇ-મેઇલ દ્વારા શુભેચ્છા પાઠાવવામાં આવે છે. જેટલી નવિનતા અને સરપ્રાઇઝ શુભેચ્છામાં વધુ તેટલો આનંદ વધુ. શુભેચ્છા જેટલી દિલથી આપશો કે સ્વીકારશો , તેટલો તમારો અહમ્‍ ઘટશે, તેટલું તમારું અનાહત ચક્ર ખૂલશે, તમારી ઑરા વિસ્તરશે અને સામેની વ્યક્તિ સુધી સફળતાથી પહોંચશે. આમ શુભેચ્છા એક દિલથી બીજા દિલ સુધી સરળતાથી પહોંચવાનો માર્ગ છે. સામેની વ્યક્તિનાં દિલનાં દ્વારને ખોલવાની ઘંટડી છે. અને માટે હું કહીશ કે શુભેચ્છા એ વિશ્વનો શ્વાસ છે. જેનાં પર વિશ્વ નભે છે. શુભેચ્છાને એક જીવંત વહેવાર કહી શકાય. વહેવાર એટલે એક હાથે આપો અને બીજા હાથે લો. બ્રહ્માંડનો સિધ્ધાંત છે કે જેવું તમે આપો તેનાંથી બમણું પાછું આવીને મળે છે. વડીલો, ગુરૂજનો કે સંત તરફથી મળતી શુભેચ્છાને આશીર્વાદ કહેવામાં આવે છે.

શુભેચ્છા સહ કોઇ વાણી, વિચાર કે વસ્તુની આપ-લે થાય તો તમારૂં હ્રદય લીલુંછમ બની જાય છે. ચારે બાજુ પ્રકાશ નજરે પડે છે. તમે પોઝીટીવ વાઇબ્રેશન અનુભવો છો. બધું જ સારું થઇ રહ્યું છે તેવો અહેસાસ થાય છે. અને જો તેનાથી વિરુધ્ધ હોય તો તમે ઉદાસીનતાથી ઘેરાયેલા લાગો છો. કંઇક અમંગળ થવાનું હોય તેવો ભાસ થાય છે.

શુભેચ્છા એવું જીવંત રસાયણ છે કે મરતાં માણસને બેઠો કરે છે. મડદાને બેઠાં કરવાની તાકાત તેનાંમાં છે. સવાર, બપોર કે રાત્રિ શુભેચ્છા વગરની હોઇ જ ના શકે. ગુડમોર્નિંગથી ગુડનાઇટ અને સ્વીટ ડ્રીમ્સની શુભેચ્છાથી મનુષ્ય તાજગી સભર રહે છે. શુભેચ્છાનાં વરસાદમાં છત્રી ના જોઇએ. તેમાં પલળવાનું, ભીંજાવાનું મન થાય. તો ચાલો, આપણે સૌ એકબીજા માટે શુભેચ્છાઓનો વરસાદ વરસાવીએ.

સર્વે ભવન્તુ સુખીન:, સર્વે સન્તુ નિરામયા:
સર્વે ભદ્રાણી પશ્યન્તુ, મા કશ્ચિદ્‍ દુ:ખમાપ્નુયાત્
ૐ શાંતિઃ શાંતિઃ શાંતિઃ

કલ્પના રઘુ

“શુભેચ્છા સહ”-પ્રજ્ઞા દાદભાવાળા

દિવાળીના દીવડાની જેમ ઝગમગતા બધાજ લખનાર અને વાચનાર, પ્રોત્સાહના આપનાર અને લખવાનો ઉત્સાહ દેખાડનાર બધા જ અમારા મિત્રોને દિવાળીના શુભ અવસરે નવીન હર પળ મુબારક દિવાળીની ખૂબ ખૂબ શુભ કામનાઓ અને નવા વરસના સૌને નુતનવર્ષાભિનદન .

Happy Diwali

દિવાળી આવી દિવાળી આવી, દીવડા સાથે શુભેચ્છા લાવી

શુભ: લાભ: ઘરના ઉંબરા ને કુમ કુમ પગલે વધાવતી આવી

નિર્મળ મનથી  સ્વચ્છ આંગણીયે દીપતી રંગોળી લાવી

સાથીયા ને તોરણ જ શુભેચ્છા બની, કલ્યાણની ભાવના લાવી    

સુંવાળી, મઠીયાં, ઘૂઘરા સાથે ફટકડા જેવી ઈચ્છાપૂર્તિ લાવી

વાઘ બારશ, ધન તેરસ, કાળી ચૌદશ, અમીની દ્રષ્ટિ લાવી

પૂજા અર્ચના આશા ઈચ્છા મહેચ્છા ને શુભેચ્છા  સાથે લાવી

સ્વસ્તિવચન,તૃષ્ટિવચન શુભ ઈચ્છા અંતકરણ લાવી

આત્માની જ્યોત પ્રગટવાનો ઉત્તમ અવસર લાવી

 નૂતન  વરસના આ નવલુ મંગલકારી  પ્રભાત લાવી  

મનોકામના લાવી,ઉજળા ભવિષ્યનો આવાહન લાવી

દિવાળી શુભ શુભેચ્છા સુસ્વાગતમ ઝગમગ  લાવી

cropped-diwali1.jpgમિત્રો, સ્વજનો સાથે” શબ્દોનું સર્જન”  તથા “બેઠકના” પરિવારને નવા વર્ષની શુભકામનાઓ.

પ્રજ્ઞાજી -પ્રજ્ઞા દાદભાવાળા