સંવેદનાના પડઘા- ૨૦ અમર વો નવજવાં હોગા

ભીગોકર ખૂનમેં વર્દી ,કહાની દે ગએ અપની

મહોબત  મુલ્કકી, સચ્ચી નિશાની દે ગયે  અપની

મનાતે  રહે ,વેલેનટાઈન ડે હમતુમ

વહાં કશ્મીરમેં સૈનિક જવાની દે ગયે અપની

આપણે સૌ જ્યારે વેલેનટાઈન ડે મનાવી રહ્યા હતા ત્યારે કાશ્મીરના પુલવામામાં ૪૪ જવાનો આતંકવાદી હુમલામાં શહીદ થઈ ગયા.આખા ભારતદેશમાં આજે  સન્નાટો છવાઈ ગયો .એક એક ભારતીઓનું દિલ આજે અસહ્ય વેદનાથી રડી રહ્યું છે.બધાંના મન મસ્તિષ્કમાં આતંકવાદી માટે ગુસ્સા અને બદલાનો લાવા પ્રજ્વલિત છે .દેશવાસીઓ એકજૂટ થઈને શહીદોના પરિવારની સાથે હોવાનું  જતાવી રહ્યા છે ત્યારે આપણે  પણ દેશપ્રેમ કે દેશદાઝ સિવાયની કોઈપણ સંવેદના કેવીરીતે અનુભવી શકીએ ????????

બધા જુદા જુદા મીડિયા અને ટીવી પરનાં સમાચારોને જોઈને ઝંઝોડાયેલ મારું વિક્ષિપ્ત મન મોડી રાત્રે ઊંઘમાં પણ જાગતું જ રહી સપનામાં પહોંચી ગયું મારા વતનમાં.

દિલ્હીમાં  જવાનોના એ  ચુંવાલીસ કફનને જોઈને મારી છાતી દર્દથી ફાટી રહી હતી. મોદીજી પોતાના પરિવારના સદસ્યના અંતિમ સમયે ઘરની વ્યક્તિઓ પ્રદક્ષિણા કરે તેમ અતિ વ્યથિત હ્રદયે જવાન શહીદોના કફનની પ્રદક્ષિણા કરી રહ્યા હતા.મોદી વિરોધીઓ તેમને આજે જે કહેવું હોય તે કહે. તેમના રાજકારણ અંગે મને કોઈ ચર્ચા નથી કરવી.આ સમય પણ નથી તેનો પણ એક ખરા દેશસેવકની વેદના તેમના મુખ પર છવાએલી હતી અને તેમના અવાજમાં પણ હરએક ભારતવાસી જેવાજ દર્દ અને ગુસ્સો ઘુંટાએલ હતો.જેમણે દેશ માટે પોતાનું જીવન સમર્પિત કરી દીધું છે તેમની પર કોઈ પણ જાતના આરોપ મૂકવા કે સલાહો આપવી વ્યાજબી છે???એના માટે બધાંએ ધૈર્ય ધરવું તેજ માત્ર રસ્તો છે ,તેમના પર દબાણ નહી વધારવાનો. તેઓ ચોક્કસ આ આંતકવાદી હુમલાનો જવાબ આપશેજ એવો વિશ્વાસ રાખવો જોઈએ.

ભારતનાં દરેક જુદા જુદા રાજ્યના આ શહીદ જવાનો હતા.કાશ્મીરથી લઈને કેરાલા અને ગુજરાતથી લઈને આસામ -કોઈ રાજ્ય બાકી નહી.બધાં શહીદોના કુટુંબીઓની સાથે દેશનો એક એક નાગરિક ક્રિકેટર,એક્ટરથી માંડીને એક નાનામાં નાનો કામદાર પણ  છે.બધાં  તેમને મદદ કરવા તેમજ દુ:ખની પળોમાં હિંમત આપવા તૈયાર છે.દેશ આજે પોતાના બધા મતભેદ અને જાતિવાદ ભૂલીને એકજુટ થઈ ગયો છે તે જોઈને મારી છાતી ગજ ગજ ફૂલી ગઈ છે.દેશનાં રાજ્યો,જાત,ભાષા જુદા જુદા છે પણ તિરંગો ધ્વજ બધાનેા એક જ છે.

હું તો જાણે એકએક કફન પાસે ઊભી રહું છું અને એકએક યુવાનના કુંટુંબીજનોની સંવેદના મારી આંખ સામે એક પછી એક દેખાયછે.

જવાનની માતા,પિતા,ભાઈ,બહેન,પત્ની અને ફુલ જેવા અનાથ બાળકો ની જગ્યાએ મારી જાતને મૂકું છું ત્યારે મારા છાતીના બધા બંધ તૂટી જાય છે સપનામાં પણ હું અનરાધાર વરસી પડું છું.મેઘાણીનો “કોઈને લાડકવાયો “ યાદ આવી જાય છે.જે જવાનને લગ્ન કરીને કંકુના થાપા દેવાના છે તે જવાન શહીદ થઈ પોતાના લોહીના થાપા તિરંગા ને દઈ જાયછે.તેના માતા – પિતા ,કુટુંબી જનોના હ્રદયના વિચાર માત્ર થી આખું શરીર કાંપી ઊઠેછે તેની પ્રિયતમાનો અવાજ જાણે કહેતો સંભળાય છે

છન સે તૂટે કોઈ સપના,જગ સુના સુના લાગે,કોઈ ન રહે જબ અપના,જગ સુના સુના લાગે……..

યે …….તો કયું હોતા હૈ…. મૈં તો જીઆ ન મરાં,હાય દસ મૈં કી કરા……….

જબ યે દિલ રોતા હૈ….રોયે સીસક સીસક કે હવાએ….રુકી રુકી સારી રાતે ………..

                                                                                

આ લોકો ની હાલત જોવાય તેવી નથી.જેમણે કાલે પાછા આવવાનો અને ફોન કરવાનો વાયદો કર્યો હતો તે વાયદો તોડીને હંમેશ માટે ચાલ્યા ગયા તે વાત તેમનું મન માનવા તૈયાર નથી.૪૪માંથી ૨૫ ના બાળકો હજુ પાંચ વરસથી પણ નાના છે અને એક બે તો હજુ માના ઉંદરમાં છે. તેની મા તો પતિના આવવાની રાહ જોઈ રહી છે કે ક્યારે તેનો પતિ આવે અને તેના ઉદરમાં ઉછેરી રહેલ અંશ ને તેના પેટ પર હાથ ફેરવી કહે બેટા હું આવી ગયો છું તને આ દુનિયામાં સત્કારવા માટે.૫ણ અરે ! હવે તેને  તો તેના પિતા ફોટામાં જ જોવાના છે.

એમાં એવી પણ માં છે જેણે પોતાના પતિને ગુમાવ્યો છે છતાં મા ભોમની રક્ષા માટે પોતાના દીકરાને સૈન્યમાં મોકલવા તૈયાર છે.ધન્ય છે તે જનનીને ,તે મા ની હિંમત અને દેશપ્રેમને .મને સાષ્ટાંગ દંડવત નમસ્કાર કરવાનું મન થાય છે.કોઈનો ત્રણ વર્ષનો દીકરો તેના પિતાના કફનને સલામ કરે છે અને આ નિર્દોષને કાલે પોતાના હાથે પિતાને  અગ્નિદાહ  આપવાનો છે .કોઈ જવાનની બે વર્ષની દીકરીએ પિતા પાસે મંગાવેલ ઢીંગલી તેના કફન સાથેના સામાનમાં આવી છે ત્યારે દીકરી ની માં ઢીંગલીને જોઈને પૂછે છે કે તમારા વગર મારી દીકરીને કોણ આ ઢીંગલી સાથે રમાડશે?જે જવાનના લગ્નને હજુ વરસ પણ પૂરું નથી થયું તે તેના પતિના મૃતદેહને I love you કહી મસ્તક પર ચુંબન આપે છે ત્યારે એક નસહેવાય તેવી વેદનાના ચિત્કારથી છાતી ભીંસાઈ જાયછે.કોઈ બહેન તેના ભાઈના લગ્ન માટે પિયર આવી છે અને વરયાત્રામાં જોડાવાને બદલે સ્મશાનયાત્રામાં જોડાય છે. આ દરેક શહીદના માતપિતા ભગવાનને કહી રહ્યા છે કે ભગવાન તારે જાન લેવી હતી તો અમારી લેવી હતી જેણે હજુ જિંદગીને પૂરી જોઈ,જાણી કે માણી નથી તેવા મારા દીકરાની શું કામ લીધી??તે માબાપના હૈયાફાટ રુદન માટે શબ્દો ઓછા પડે છે.આ જવાનોની યુવાન પત્નીઓ અને ફૂલ જેવા બાળકોને લોકો અને સરકાર પૈસાની મદદ કરશે પણ તેમના પતિ-પત્ની,માતા-પિતા,ભાઈ-બહેન અને બાળકોને તે શહીદ સાથેના સંબંધના પ્રાણવાયુ  કોણ પૂરશે?????????? અને મારી સંવેદનાએ માઝા મૂક્યા……….

દુ:ખ એ વાતનું  છે કે યુદ્ધ કરતા કરતા આ જવાનો શહીદ થયાં હોત તો આ લોકો એમ વિચારત કે દેશની રક્ષા કરતા જાન ગુમાવી પણ કાયર આતંકવાદીઓના  હાથનો  શિકાર બન્યા આ જવાનો.!!આંતકનું ઝેર કુમળા મગજમાં ભરનાર આંતકવાદીઓ અને તેમને પનાહ આપનાર દેશને કોઈપણ ભોગે સબક શિખવાડવો જ રહ્યો.

હવે દેશ અને દુનિયાએ એકસાથે રહીને આંતકવાદને કોઈપણ ભોગે નાથવો જ રહ્યો.કેટલા નિર્દોષ ની જાન ભરખી લેશે આ?????? દુનિયાના સૌ બુદ્ધિજીવીઓ,સત્તાધારીઓ અને ધર્મઆગેવાનોએ આગળ આવીને  એકજૂટ થઈને શામ,દામ,દંડ,ભેદની નીતિ અપનાવી આંતકવાદીઓને કચડી નાંખવા જ પડશે.સ્વધર્મનું પાલન કરવા પાર્થને બાણ ચડાવવું જ પડશે!! દૈત્યોનો વિનાશ કરવા કોઈએતો કૃષ્ણ બની રથના પૈડા રુપી સુદર્શન હાથમાં લેવું જ પડશે….તેનો સમય આવી ગયોછે…..તે થકી જ આ ૪૪ +૪ જવાનોને સાચી શ્રદ્ધાંજલિ પહોંચશે.

વતન પે જો ફિદા  હોગા,અમર વો નવજવાં હોગા…..

5 thoughts on “સંવેદનાના પડઘા- ૨૦ અમર વો નવજવાં હોગા

  1. વીર જવાનો જન્મે છે જ મરવા માટે.
    જવાન મરતો નથી,શહીદીને વરે છે,
    એની કુરબાનીની ગાથાઓ અમર છે.

    ૪૪ +૪ જવાનોને મારી શ્રદ્ધાંજલિ

    Like

  2. આતંકવાદીઓના હાથે આપણા દેશપ્રેમી, સાહસિક સૈનિકોએ જાન ગુમાવ્યા અને કેટલાય ના ઘર ભાંગ્યા અને કેટલીયે માં ના હૃદય ના ટુકડે ટુકડા થઇ ગયા. તમારુ હૃદયસ્પર્શી લખાણ વાંચી આંખ માં આંસુ આવી ગયા.

    Like

  3. જીગીષા

    અત્યારે વર્તમાન સમયે સૌ ભારતીય જે વેદના અનુભવી રહ્યા છે
    એનું શબ્દસહઃ ચિત્ર તારા લખાણમાં છલકાય છે.
    અને વાત પણ કેવી ? આપણે શાંતિથી જીવીએ એના માટે એ જ
    એ લોકો પોતાની આહુતિ આપી રહ્યા છે ને ?
    હ્ર્દયપૂરક નમન એ પ્રત્યેક જવાનોને .🙏🏼🙏🏼

    Like

Leave a Reply to Kaushik Shah Cancel reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.