સંવેદનાના પડઘા- ૧૪ શું આ જનરેશન ગેપ છે?

 જનરેશન ગેપ
મધુલિકાબેન ને આજે આખી રાત ઊંઘ ન આવી. પાસા ઘસી ઘસી ને સવાર પડી ગઈ હતી.વિચાર કરી કરીને તેમનું માથું ફાટફાટ થઈ રહ્યું હતું.સદાય હસતાં,મોર્ડન વિચાર ધરાવતા,મુંબઈમાં ઉછરેલ મધુબેન માનતા કે તેમને તો જનરેશન ગેપ નડવાનો જ નથી.તેમને તો પોતાના દીકરા-વહુ સાથે કોઈ વિચારભેદ થવાના જ નથી. એટલે તો તેમના દીકરા સિદ્ધાર્થ ઉર્ફ સીડે તેની ગર્લફ્રેન્ડ અનન્યાનીઓળખાણ મધુબેન સાથે કરાવી તો તે રાજીના રેડ થઈ ગયેલા. મોડેલ અનન્યાની સુંદરતા અપલક નેત્રોથી નિહાળીને મનોમન જ ખુશ થઈ વિચારતાં “વાહ !મારો સીડ કેવી પરી જેવી વહુ પસંદ કરી લાવ્યો!!”અનન્યા ઘેર આવે ત્યારે તેની આગળ પાછળ ફરી”બેટા, અનુ તું શું ખાઈશ? તને અમારા ગુજરાતી ખમણ બનાવી આપું ?તે તારા ડાયટફૂડમાં ચાલશે કે પછી ક્વીનવા અને ટોફુંનું બીન્સવાળુ સલાડબનાવું?” મધુબેન અનન્યાને દર વખતે અવનવા કપડાં,દાગીના,બ્રાન્ડેડ પર્સ જેવી ભેટો પણ આપતા.અરે!તેની સાથે ફોટા પડાવી ને પોતાના મિત્રો અને કુંટુંબીજનોને “મારા સીડ ની ગર્લફ્રેન્ડ”લખીને મોકલી દીધા હતા.થોડો સમય વિતતા તો એક દિવસ એમણે સીડ અને અનન્યાને પૂછી જ લીધું કે”ભાઈ તમારે હવે લગ્ન ક્યારે કરવા છે?તો હું પણ તે માટે તૈયારી કરુ” અને તે વખતે અનન્યાએ જે જવાબ આપ્યો તેનાથી તે હલી ગયા.
અનન્યાએ કીધું મને સીડ બહુજ ગમે છે.હું તેને બહુજ પ્રેમ કરું છું અને લગ્ન કરવા પણ માંગું છું પણ લગ્ન પહેલા એક વાત કહેવા માંગું છું કે “હું મોડલ છું અને મારી કેરીયર હું જરાપણ બગાડવા નથી માંગતી.મારા શરીરના શેઈપના ભોગે મારે બાળક જોઈતું નથી,એટલે બાળક મને સેરોગસી થીજ જોઈએ છે.” સીડ આ વાત જાણતો હતો પણ તે પોતાની માને આ વાત કહી શકતો ન હતો.
શૂન્યમનસ્ક થઈ ગયેલ મધુબેન કંઈપણ બોલ્યા વગર ચૂપચાપ પોતાના રુમમાં ચાલ્યા ગયા.તે રાત્રે તે જમ્યા પણ નહી.તેમનું મગજ ચકરાવે ચડી ગયું.
“મા બનવું છેપણ………….બાળકને પોતાના શરીરનું એક અંગ બનાવ્યા વગર…….
પહેલી પ્રેગ્નસી વખતનો પતિ-પત્નીનો અનેરો આનંદ અને એ ઉન્માદ………
પોતાની નાડ સાથે ના બંધન સાથે ઉછેરી રહેલ પોતાના અંશ નો અવર્ણનીય અનુભવ ………
પેટ પર હાથ મૂકીને તેની સાથે કરેલ વાતો…..ને તેને આપેલ ગર્ભ સંસ્કાર……….
છમહિના થતા બાળકે ગર્ભમાં મારેલ લાતો……..ત્યારબાદ બાળકનું ડાબેથી જમણે અને જમણેથી
ડાબેનું ગર્ભપરિભ્રમણ અને તે સાથે માતાએ પાડેલ તીણી ચીસ…..
પતિનું પત્નીના પેટ પર કાન મૂકીને બાળકના ધબકારાનું સાંભળવું……
સેરોગસી થી જન્મેલ બાળકની મા કેવીરીતે અનુભવશે આ સંવેદના?????
પ્રસવની પીડા વગરનું માતૃત્વ શું માને ભગવાનના તોલે તોલી શકશે?
સેરોગસી તો તેને માટે છે જે સ્ત્રી શારીરિક ખામી થકી બાળકને જન્મ આપવા શક્તિમાન નહોય!
વિચારોની વણઝાર મધુબેનનો પીછો છોડતી નહોતી. તે વિચારતા હતા.
કુદરતની કરામત પર આફરીન થઈને પહેલી વાર બાળકને કરાવેલ સ્તનપાન…..
પોતાના પાલવથી લૂછેલ બાળકના સ્તનપાન કરાવેલ હોઠ અને માના દૂધની સાડલામાંથી આખો
દિવસ આવતી આહ્લલાદક સુગંધ….
બાળક ચાર પાંચ મહિનાનું થાય અને કામથી મા બહાર ગઈ હોય ત્યારે બાળકનું ભૂખ્યું થવું અને
માની બન્ને છાતી માંથી ઊભરાતી દૂધની અવિરત ધારા …………..આ મા-બાળકના અનેરા જોડાણ નું શું?
આ બધા અનોખા સંવેદનો વિહીન અને લાગણીવિહીન કોરાધાકોર સેરોગસી માતૃત્વ નો શો અર્થ???
આ મોર્ડન સમાજે માતૃત્વ ની લાગણીઓને કચડી ને ભૂક્કા કરી બોદી બનાવી દીધી!!!
મધુબેન આજે મોડે સુધી રૂમમાંથી બહાર ન આવ્યા.સીડ જોબ પર ચાલી ગયો હતો ને એટલામાં જ
ફોનની રીંગ વાગી .તેમની નાનપણની ખાસ સહેલી નીલુનો ફોન હતો.નીલુને પણ મધુબેન પોતાનો
અનન્યા સાથેનો ફોટો મોકલ્યો હતો.મધુનો આજે ઢીલો ઉત્સાહ વગરનો અવાજ સાંભળી પૂછ્યું”કેમ આજે તારી તબિયત બરાબર નથી?”ભરાઈ ગયેલી વાદળી વરસી પડે તેમ મધુબેન પણ નીલુ પાસે વરસી પડ્યા.પરતું મધુની બધી વાત સાંભળી નીલુએ જે જવાબ આપ્યો તે સાંભળી મધુબેનની તોબોલતી જ બંધ થઈ ગઈ.મધુ તારે મારી વાત સાંભળવી છે?એમ કહી નીલુએ કીધું “મારા હાર્ટસર્જન દીકરા ને વહુએ તો કહી જ દીધું છે કે અમારી પાસે બાળક ઉછેરવાનો ટાઈમ નથી એટલે અમે ક્યારેય બાળક લાવવાના જ નથી.મા તે અમને મોટા કર્યા હવે અમારા બાળકને તું મોટું કરે તેવું અમને જોઈતું નથી.”એટલે તારે ત્યાં તો સેરોગસીથી પણ પૌત્રકેપૌત્રી ની કિલકારી સાંભળવા મળવાની છે.હું તો એનાથીજ વંછીત રહેવાની છું.નીલુએ એક ઊંડાે નિસાસો નાંખતા કીધું”મધુ ,આ અમેરિકાએ આપણા છોકરાઓને ઊંચી પદવીઓ,ખૂબ પૈસો,માનપાન,સુખ સગવડો ને સવલતો બધું આપ્યું પણ માતૃત્વ જેવી લાગણીનું આકાશસાવ કોરુંધાકોર કરીને!!! સંવેદનાની ભીનાશને આમ ચૂસી લઈને!!!! બાળકો વગરની તેમની વૃદ્ધાવસ્થા કેવી હશે?
મધુએ પૂછ્યું”આ માતૃત્વ નો અસ્વીકાર અને શરીર જાળવવા સેરોગસીથી બાળકને જન્મ આપવો જેવી આ મોર્ડન  વિચારસરણી આપણે  પચાવી નથી શકતા.તે શું આપણો નવી પેઢી સાથેનો જનરેશન ગેપ છે???????
જિગીષા પટેલ

9 thoughts on “સંવેદનાના પડઘા- ૧૪ શું આ જનરેશન ગેપ છે?

  1. સરસ વાત.જનરેશન ગેપ હતો,છે અને રહેશે.તેમાંથી બચવાનો સરળ ઉપાય અપેક્ષા અને ઉપેક્ષા ના કરવી.જો કે બોલવું સહેલું છે,માથે આવે એનેજ ખબર પડે.આ તો થઇ માતૃત્ત્વ અને બાળકો માટેની વાત.પરંતુ હવે તો એવા દિવસ આવ્યા છે કે છોકરો કોઈ છોકરી સાથે લગ્ન તો કરેછે?છોકરો છોકરા સાથે લગ્ન કરતો નથી ત્યાં સુધી મા- બાપ નસીબદાર.! તમે ગમે તેટલા સારા હો પણ નસીબ તેનો ભાગ ભજવે છે.સ્વીકાર કરીને સુખી થવું રહ્યું.

    Liked by 2 people

    • બહુ સાચી વાત કરી કલ્પનાબેન ! પ્રગતિની ઘેલછામાં
      પ્રકૃતિના નિયમો પણ બદલાઈ રહ્યા છે .. તમે ઈચ્છો કે નહીં , તમને ગમે કે નહીં પણ આ નવયુગની ભેટ છે: સ્વીકારો

      Like

    • કલ્પનાબેન,
      આજે જિગિષા જે જનરેશન ગેપની વાત લઈને આવી એના અનુસંધાનમાં તમે જે વાત કરી એ પણ સ્વીકારવી રહી.

      Like

    • કલ્પનાબેન કોઈ છોકરો છોકરા જોડે સબંધ બાંધે તેમાં પ્રકૃતિ નો જ ફાળો છે તેથી જ તેવા સબંધો સદીઓ જુના ખજુરાહો ના મંદિરો ઉપર કોતરાયેલ છે. પરંતુ જુના જમાનામાં લોકો સ્વીકારતા નતા તેથી તે પ્રકૃતિ વળી વ્યક્તિઓ માટે છૂટ થી જીવવાનો માર્ગ નહોતો। તેઓ ક્યારેક નાસીપાસ થઈને મ્ર્ત્યુ સ્વીકારવા પણ તૈયાર રહેતા। જયારે આજે આવી વ્યક્તિઓ સમાજ માં માન થી જીવી શકે છે. આ પ્રગતિ ને હતાશ થઈને અપનાવવાની બદલે ખુશીથી તેવી વ્યક્તિઓનો સમાજે સ્વીકાર કરવાની જરૂર છે. તેઓ કોઈને દુઃખી નથી કરતા માત્ર પોતાનું સુખ શોધે છે. મારીજ સહેલી નો સુંદર છોકરો બીજા છોકરા જોડે સબંધ બાંધે છે. તે ખુબજ હોશિયાર છે અને માતા પિતા જોડે મમતા અને માન થી વર્તે છે.

      Like

  2. જિગિષા,
    આજની વાતની રજૂઆત ખુબ સરસ છે.

    સાથે એ વાત પણ નિશ્ચિત છે કે એને જો આજની જનરેશનની દ્રષ્ટિએ જોઈશું તો કદાચ આ વાત સ્વીકારવી સહેલી લાગશે કારણકે સમયની સાથે સૌના મન પર સ્વતંત્ર વિચારો હાવી થયા છે. આજે કોઈપણ ભણેલી અને પોતાની જાતને મહત્વ આપતી યુવતિઓને પોતાના શિખરો સર કરવા છે. જે યુવતિઓએ અથાગ લગનથી કારકિર્દી ઉજ્જવળ કરી છે એમના મૂલ્યો, એમના દ્રષ્ટિકોણ સાવ અલગ છે. પારંપારિક પરિવારની વ્યાખ્યા એમને મન બદલાઈ ચૂકી છે.
    પહેલાં પરિવારની વ્યાખ્યા અમે બે-અમારા બે સુધી સીમિત હતી એ પછી અમે બે -અમારું એક એમાં પરિવારનું સુખ સમેટાઈ જતું. હવે સમય છે એનાથી એક વધુ સ્ટેપ લેવાનો એટલે આ વાત એમની રીતે વિચારીશું તો જનરેશનગેપની ખાઈ એટલી ઊંડી નહી લાગે.

    Like

  3. આભાર કલપનાબેન,ગીતાબેન અને રાજુ.ચાલો ત્યારે સૌ સાથે મળીને નવી પેઢીના નવા વિચારો સાથે ગઠબંધન કરી તેમને અને તેમના વિચારોને સમજવા કોશિશ કરી ખુશ રહીએ.તેમ કરી જનરેશન ગેપ ઘટાડીએ.😆

    Like

  4. સરસ વાર્તા જિગીષાબેન। પણ હું નથી માનતી કે આને જેનરેશન ગેપ નું નામ આપી શકાય। સંવેદના ની ભીનાશ ને ચૂસીને જીવવાનું દરેક જેનરેશન માં બને છે ભલે તે જુદી રીતે અને જુદા જુદા વર્તન માં જણાય। ક્યારેક માતા પિતા ના અનાદર માં તે દેખાય, ક્યારેક છોકરાઓ પ્રત્યેની બેદરકારી માં તે વરતાય, ક્યારેક પતિ પત્ની ના સંબંધ માં તે દેખાય। પણ દરેક જેનરેશન માં તેવી વ્યક્તિઓ હોય છે જે સંબંધો નો અનાદર કરે છે અને સંવેદના ની કુંપણો ને પાંગરવાની બદલે તેમને ભૂંસી નાખે છે.

    Like

    • હું એમ માનું છું કે દરેક નવું જેનરેશન બદલે છે, બગડતું નથી કેમકે જો જેનેરેશન બગાડતાંજ જાય તો કેટલા જેનરેશન માં માનવ જાતિ નાશ પામે તેજ જોવાનું રહ્યું। પણ નાશ પામવાની બદલે માનવો તો પાંગરી રહ્યા છે અને જાત જાતની પ્રગતિ કરી રહ્યા છે.

      Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s