દિવાળી-રોહીત કાપડિયા

માનનીય પ્રજ્ઞાબેન,

        કુશળ હશો. દિવાળી અને યુદ્ધને સાંકળતી એક રચના મોકલું છું. યોગ્ય લાગે તો સ્વીકાર જો.

                                                                                રોહીત કાપડિયા

                                                        દિવાળી

                                                ————————–

                                             જીવનની પરિભાષાથી અજાણ,

                                             યુદ્ધની પરિભાષાથી અજાણ,

                                             એ નિર્દોષ અને માસૂમ બાળક

                                             અચાનક જ બંદૂકના ભડાકા સાંભળી

                                             બોમ્બને તોપના ધડાકાઓ સાંભળી

                                             ફેલાયેલી આગની પ્રચંડ જવાળાને

                                             રોશનીનો ઝગમગાટ સમજીને

                                             એનાં પિતાને પ્રશ્ન કરે છે

                                             ” પપ્પા , દિવાળી તો આવી ગઈ ,

                                             મને નવા કપડાં નહીં અપાવી દો ?

                                             અને એ જ કમનસીબ રાતનાં,

                                             બોમ્બ સ્ફોટમાં જન્નતનશીન થયેલાં,

                                             એ બાળકનાં મૃત શરીર પર ‘

                                             નવુંનક્કોર કફન ઓઢાડતાં

                                            એનાં પિતા બધી જ મર્દાનગી ભૂલી,

                                            જિંદગીમાં પ્રથમવાર રડી પડ્યાં.

                                                                                       રોહીત કાપડિયા